~*¤ô§ô¤*~البارتـ الثانــيـ~*¤ô§ô¤*~


اليوم اللي بعده قاعده بسيل بعد ما صلت وقرأت القرآن تفكر .. بنجح في الخطوة اللي بسويها ؟؟.. وبتشجع والله لا!!.. يالله وفقني في كل خطوة بخطيها .. وسمعت طق على الباب ..
بسيل: دخلي ماماتي الباب مفتوح ..
استغربت بسيل من باسل لأن هو اللي داخل عليها ..
بسيل قامت وشالت حرام الصلاة من على راسها .. وطوت مصلتها .. واتقربت من باسل اللي قاعد على الكرسي اللي صوب سريرها ..
بسيل: شفيك؟؟
باسل: ولا شيء ..
بسيل: مو من عوايدك تقعد هالوقت؟؟
باسل: ما جاني نوم من بعد صلاة الفجر .. وقلت اكيد انتي قاعده .. فــ قلت اقعد معاج عن الملل
بسيل: فديتك والله ..
باسل: زين ما صار امس وقت اسألج .. شخبارج بالشغل مرتاحه؟
بسيل: أي الحمد لله .. رحت مستشفى الطب النفسي .. عشان ابدأ اول كتاباتي من هناك
باسل: شلون يعني ؟؟
بسيل وهي تقعد على الأرض مقابلته: الله يسلمك يا طويل العمر .. سلموني صفحة القضايا الإجتماعية .. وآنه من بعد ما فكرت وين أقدر ألاقي قضايا يمكن تكون عبره للناس ولها معنى .. فـ من الأماكن اللي خطرت علي هناك ..
باسل: كأن الشغله تعب؟؟
بسيل: لاا بالعكس احس بعطي شيء للمجتمع .. وإذا استفادوا من القصص والعبر اللي بتمر عليهم يمكن يحسون لأفعالهم وزلاتهم واخطائهم .. وحلاتك تكون عنصر ايجابي بالمجتمع .. وتفيد ومنها تستفيد .. عمرك ما بتحس بالتعب اذا حصلت من بعده حصد ..,,
باسل: حلو تفكيرج بصراحه .. احسد اللي بياخذج ..
بسيل: ههه عيب الف مرة اقول لك ريلي اتركه عنك بعيد .. بلا حسد فيه .. وبعدين سارو مو ماليه عينك؟؟
باسل: اول شيء اسمها سارة .. وبعدين اكيد هي شيء وانتي شي ثاني ..
بسيل: اعرررررف .. بس صج باسل متى تفكر تخطبها ؟؟
باسل: ما أدري .. إذا وصل الوقت المناسب ..
بسيل: ما تخاف إنها تطير من يدك؟؟
باسل: اذا مثل ما تقولين .. وانها تبيني .. مستحيل تكون لغيري .. وبعدين اللي كاتبه الله بصير ..
بسيل: والنعم بالله .. باسلووو الساعه صارت 5 ما جهزت ثياب لي .. ولا جهزت الريوق .. وماماتي مالها حس ولا خبر ..
باسل: ههه خلج انتي جهزي اغراضج .. وثياااابج .. وآنه بروح اشوف امي ..
بسيل: خلاص صار ..
راحت بسيل وطلعت لها جينز ازرق وعليه بدي ابيض ومكتوب عليه بلون الازرق مثل الجينز .. وطلعت لها عباية ناعمة .. ومافيها خرابيط وايد .. وطلعت لها شيله زرقاء وفيها ابيض .. وشنطة مثل الوان الشيله .. ودخلت اخذت لها شور سريع .. لأن مافي وقت .. وطلعت لبست ثيابها .. وجففت شعرها .. وحملت الشيلة والعباية والشنطة ونزلت تحت .. ورمتهم في الصاله على صوب .. ودخلت لهم المطبخ ..
بسيل وهي تبوس امها على راسها: صباح الخير لأحلىى ام بالدنيااااااا
ام باسم: صباح الوررررد يا الورد كله ..
بسيل وهي تقعد على السفرة صوب امها: شخبارج اليووم
ام باسم: بخير يا ويه الخير اسأل عن وردتي ..
بسيل: آنه مو بخير
باسل دخل روحه: افا ليش؟؟
بسيل: عشاني صبحت بويهك اليوم الصبح مو بويه ماماتي
باسل: مو منج مني آنه اللي رايح لج غرفتج واسولف معاج واونسج ..
بسيل: فديتك .. لا لا لا مو هذا السبب
ام باسم: عيل؟؟
بسيل: لأنكم تريقتوووون عني
ام باسم: فديتج .. اخوج بيتأخر عن شغله .. ما يصير
بسيل: ههههه عليكم بالعافيه .. ماعليكم مني بس كنت امزح معاكم ..
باسل: يالله انا بمشي .. تآمرون على شي
ام باسم: سلامتك يا وليدي ..
بسيل: وآنه بعد ماماتي بمشي ..
وقامت وقفت ..
ام باسم: وين وين اتريقي بالأول ..
بسيل: كليييييت وشبعت الحمد لله .. يالله لا اتأخر عن شغلي ..
ام باسم حملة الكوب اللي فيه الحليب: حمليه معاج .. واشربيه بالسيارة ..
بسيل اخذته من عند امها: اوكي باخذه وياي ..
ام باسم: وبخورج بالصاله فديتج
بسيل: تسلميييين ماماتي ..
وراحت بسيل لبست عبايتها وشيلتها وبخرت روحها .. وحملت شنطتها .. وراحت الى امها مرة ثانية المطبخ وباستها على راسها ..
بسيل: يالله ماماتي مع السلامه .. ودعواتج
ام باسم: الله يسلمج .. والله يوفقج ان شاء الله
طلعت بسيل من بعد ما لبست نعالها الأبيض .. وركبت سيارتها .. حاولت تفتحها بس ما تفتح معاها ..
بسيل: لاااااااا فتحي انتي مو وقتج ..
وحاولت معاها كذا مرة ..
بسيل: حرام ابي اروح بتأخر ..
كانت بتنزل بس قالت بتجرب لآخر مرة .. والحمد لله اشتغلت السيارة هالمرة .. وبدأت في رحلتها الى اليوم .. وصلت المجله .. ودخلت الى المكتب اللي هي فيه ..,,
بسيل: السلام عليكم ..
ريم: عليكم السلاااااام ..
بسيل تطالع يمين يسار: وينها قطوة المجله ؟؟
ريم: للحين ما وصلت
بسيل: ههههه ان شاء الله ما توصل للأبد
ريم: حرام عليج
بسيل: اففف منها نسيت اسألج حتى عن احوالج ..
ريم: الحمد لله على كل حال .. وانتي
بسيل ابتسمت لها: بخير الحمد لله ..
ما تدري ليش بسيل حست ان ريم وراها شي في حياتها .. وشي كبير بعد .. يالله يكون بعون كل من فينا .. تذكرت القضية اللي امس كانت فاتحتنها في النت .. ورجعت لنفس الموقع عشان تفتحها .. وهني دخلت ترنيم ..
ترنيم: هاي
ريم: عليكم الهاي
ترنيم: قلنا هاي
بسيل: يوم ان السلام صار هاي .. بنقول لج وعليكم السلام والرحمة ..
ترنيم: افففف انتي ليش جذي وياي؟؟ .. شسويت لج آنه ؟؟
بسيل قالت تقوم ابرك لها .. لو تقعد دقيقه وحده معاها بتعكر مزاجها من الصبح .. حملت نفسها ووقفت ..
ريم: وين رايحه؟؟
بسيل: بستأذن من المدير عشان اتابع موضوع البارحه ..
ريم: الله وياج ..
بسيل ابتسمت لها وراحت الى المدير ..
بسيل: سلام عليكم
السكرتيرة: عليكم السلام يا هلا اختي ..
بسيل: بغيت ادخل على المدير شوي
السكرتيرة: بس المدير للحين ما وصل
بسيل تقول بخاطرها: اففففف منه هذا كل يوم بيتأخر جذي يعني !!..
بسيل: اوكي شكراً ..
التفتت بسيل لجهة الباب بتطلع بس شوي وبتنصدم بشخص على الباب .. لكنها رجعت على وراء ..,,
بسيل: آسفة اخوي ما انتبهت ..
فراس كمل طريقة ولا كأن صار شي !! وبإبتسامته اللي ما تفارقه دوم: السلام عليكم ..
بسيل والسكرتيرة: عليكم السلام ..
فراس وهو يطالع بسيل: الحقيني اخت .. وسكت
بسيل بصوت خفيف: بسيل
فراس: الحقيني يا اخت بسيل على المكتب .. والتفت الى السكرتيرة: دخلي لي البريد من بعد ما تطلع من عندي ..
السكرتيرة: ان شاء الله استاذ ..
دخل فراس وقعد على الكرسي .. ودخلت بسيل من بعده .. التفت لها ولقاها للحين واقفة ..
فراس: اقعدي استريحي ..
بسيل من بعد ما قعدت: سوري على اللي صار .. وبعدين سوري عشان إني جيت مكتبك في هذا الوقت
فراس: ماصار شي .. وبعدين المكتب مكتبج وهذا شغلج .. ومافيها شيء اذا جيتين بداية الدوام ..
بسيل: كنت ابي آخذ الاذن منك عشان اروح اراجع المستشفى ..
فراس: خلاص صار .. روحي .. ولا تنسين تردين علينا خبر ..
بسيل وهي توقف: مشكور اخوي ..
وطلعت عنه .. وفراس من صوب ثاني .. يسترجع كل كلمة قالتها .. ويقول بخاطره .. والله إني بحياتي كلها ما مرت علي بنت مثلها .. وقطع على تفكيره صوت السكرتيرة اللي واقفه على رأسه: استاذ البريد ..
فراس: خلاص خليه على الطاولة .. وشوفي شغلج

راحت بسيل المكتب مرة ثانية ..
ريم: الا رجعتي؟؟
بسيل: باخذ شنطتي ..
ريم: قلت يمكن المدير ما وافق والله شيء ..
بسيل: ههههه لا ليش ما يوافق بالله عليج؟؟
ريم: كل شيء اتوقعيه في هذا الزمن ..
بسيل ابتسمت الى ريم: يالله مع السلامه
ريم: الله يسلمج وبالتوفيييق ..
طلعت بسيل ومشت على نفس الطريق اللي مرت فيه امس .. طريقها الى المستشفى .. وطول الوقت تدعي ربها ان شاء الله في احد من المرضى يتعاون معاها ويقبل انها تناقش معاه قضيته .. وصلت المستشفى .. ونزلت من بعد ما عدلت شيلتها ... ودخلت من الباب الرئيسي وهي متجهه إلى باب غرفة الدكتورة اللي دخلت عليها يوم أمس .. وطقت الباب على خفيف .. وفتحته بكل نعومة ..
بسيل: السلام عليكم ..
الدكتورة: عليكم السلام ..
بسيل شافت ان مع الدكتورة بنت ..
بسيل: انتظرج بره .. وبس تكملين ادخل لج .. وآسفة على الازعاج ..
الدكتورة قامت وقفت وتقربت من بسيل: هذي من المرضى اللي عندهم مشكلة او بالأحرى صارت لها قضية .. وكلمتها بالموضوع .. وحبت الفكرة .. وقالت انها مستعده تقول لج عن قضيتها ..
بسيل وقفت محتارة .. تطالع البنت وهي صغيرة يبان عليها عمرها 20 او اقل حتى!!.. شنو بتكون قضيتها يعني!! .. ووجهت نظراتها من بعدها إلى الدكتورة بصمت ..
الدكتورة: دخلي تفضلي داخل
دخلت بسيل وراء الدكتورة .. و أشرت لها الدكتورة انها تقعد بالكرسي اللي مقابل المريضة ..
الدكتورة:هذي هي اول بنت حبت تتعاون معاج .. وفي غيرها صبي اذا كملتين مع البنت قضيتها اقدر آخذج للصبي ..
بسيل: تسلمين دكتورة .. ما اتوقعت ان احد بيتساعد معاي هالكثر .. مشكورة ..
الدكتورة: هذا واجبنا .. وآنه حبيت معاج الفكرة عشان توصل للناس قضايا حقيقية نعيشها في مجتمعنا .. وعشان يوعون لأخطائهم اكثر ..
بسيل: شكراً
ابتسمت لها الدكتورة: يالله باخذج معاها الى غرفة تقدرين تناقشين معاها هناك اللي تبين .. بس ها هالله هالله في بنتنا .. ما اوصيج عليها .. لأني ما بقدر اقعد معاكم وراء مواعيد ضروري التزم فيها
بسيل: لا تخافين اقضي شغلج .. وهي بتكون في عيوني ..
اخذتهم الدكتورة الى غرفة صغيرة شوي .. ومجهزة ببعض الأدوات .. كان فيها 4 كراسي .. قعدت بسيل على كرسي وقعدت المريضة على كرسي .. بحيث يكونون مقابلين بعض ..
الدكتورة: يالله استأذن
بسيل: اذنج وياج ..
التفتت بسيل الى المريضة .. من وصلت المستشفى للحين ما تكلمت!!..
بسيل: شسمج؟؟
.....: اسمي سناء
بسيل: عاشت الأسامي يا سناء ..
سناء: عاشت ايامج
بسيل: تسلمين .. آنه اسمي بسيل من مجلة " ... " ..
سناء: هلا بيج
ابتسمت لها بسيل: جم عمرج يا سناء؟
سناء: 18 سنة
استغربت بسيل بس هي متوقعه من البداية انها تكون بهذا العمر ..
بسيل: آنه هني عشان اناقش معاج قضيتج اللي وصلتج الى هني .. واظن ان الدكتورة شرحت لج عشان شنو .. عشان نوصل صورة للمجتمع عن اللي قاعد يصير فيه.. اتمنى توثقين فيني وتقولين لي كل شيء .. واعتبريني اختج وصارحيني باللي في قلبج كله .. وصدقيني محد بعرف انج انتي صاحبة الموضوع لو مهما كان الموضوع .. لأن ما بذكر في المجلة أي اسماء .. حبيت اقول لج هذا الشيء عشان تكبر الثقة بيني وبينج وتقولين لي كل شيء ..
سناء بإبتسامة باهته: ان شاء الله اعطيج كل اللي في قلبي .. مو عشان شي .. خايفة ان الف من البنات غيري يكونون بموقفي .. صدقيني صعب موقفي في الحياة كلها .. صعب!!..
بسيل: زين ابدأي واسردي لي اللي عندج ..

ودي ابكي لين ما يبقى دموع .. ودي اشكي لين ما يبقى كلام ..
من جروحٍ صارت بقلبي تنوح .. ومن هموم حرمت عيني المنام ..

سناء: آنه سناء وعمري الحين 18 سنة مثل ما قلت لج .. عايشة ببيتنا مع امي وابوي واخوي اللي اكبر مني بسنتين بس.. واختي اللي اصغر مني بخمس سنين .. بدأت قصتي قبل شهور بس .. غمضت سناء عينها وهي تتذكر ذاك اليوم بحسره وألم .. كنت راده من المدرسة .. بباص المدرسة .. آنه وكانت وياي رفيجتي .. ودعتها في نص الطريج .. لأن بيتهم شوي بعيد عن بيتنا .. تقربت اكثـر من البيت .. طقيت الجرس .. محد كان يفتح لي الباب .. تعبت انادي .. اطق الباب بإيديني .. بس محد يسمع .. للحظة يأست منهم .. واتوقعت ان محد يكون بالبيت .. شافني ولد جيرانا .. وهو ربع مع اخووي .. ناداني بإسمي .. لأن يعرفني من الصغر .. بس لما كبرنا شوي كل واحد راح إلى طريجه ..
فيصل: سناء!!
نزلت عيوني للأرض لأني مو متعودة اكلمه من لما كبرت .. وهو تقرب مني اكثر ..
فيصل: شفيج واقفة بالطريج؟؟
سناء: ولا شي .. بس كنت راده من المدرسة .. ومحد الظاهر هني .. تعبت وآنه اطق الباب محد يفتح لي .. وما عندي مفتاح للبيت حتى ..
فيصل: زين تعالي معاي البيت وبخليج تتصلين لهم
سناء: لا لا .. بنتظر هني .. اكيد في احد داخل البيت .. والله الحين برجعون ..
فيصل: شفيج خايفه؟؟ .. باخذج عشان تتصلين لبيتكم .. وبعدين امي واختي بالبيت ..
ترددت آنه شوي بالبداية إني اروح معاه .. بس لما قال لي ان امه واخته بالبيت ارتحت شوي .. حملت شنطتي اللي رميتها على الأرض .. ومشيت معاه .. بكل تعب .. مع ان احس شيء بداخلي يمنعني بس اجر روحي بثقل .. واخيراً وصلت لبيتهم!! .. دخلني غرفة .. وكأنها كانت مجلس .. طلع عني .. وظليت بالغرفة بروحي!! .. قعدت على اقرب كرسي لي .. وظليت اتأمل المكان .. الظاهر مافيه أحد! .. يا ربي آنه شسويت !! .. رميت الشنطة من ايديني صوبي .. وارتجفت كلي لما دخل وعطاني التلفون .. وطلع هو للمرة الثانية .. رحت اركض للتلفون وكأني مجنونه من الخوف اللي كان يعتصر داخل قلبي .. رفعت السماعه .. لكن اتفاجأت لما لقيت ان التلفون مافيه حرارة!!!!!!!.. دق قلبي بسرعه وكأنه يعلن نهايته .. سمعت صوت الباب .. لقيته فيصل .. دخل وقفل الباب وراه!!.. تقرب مني .. حاولت ابتعد .. لكني كل ما ابتعدت اقترب مني اكثر .. رحت الى الباب .. احاول افتحه بس شلون وهو مقفل!!.. تساندت على الباب وآنه خايفة من قصد فيصل واللي براسه ..
سناء: فيصل حرام عليك .. خلني اروح البيت
فيصل: بخليج تروحين بس من بعد !!!...
سكت واقترب مني اكثر واكثر .. مد ايده بكل نعومه ومسح على خدي .. باعدتها بس قربها مرة ثانية.. ومسك ويهي بالقوة وباسني .. اتباعدت منه خايفة ..
سناء: حراااام عليك .. شقاعد تسوي .. آنه اخت رفيجك .. والله حراااااام عليك ..
فيصل ما سمع لها كلام .. نسى ان اللي قدامة بنت جيرانهم .. نسى للحظة انها تكون اخت رفيجة .. نسى ان اللي سواه واللي بسويه غلط .. لأن الشيطان اكبر منه في ذيك اللحظة .. وتقرب منها اكثر واكثر ..
نزلت دمعة حارة من قلب من عيون سناء في ذيك اللحظة ..
سناء: اغتصبني .. وآنه بدوري استسلمت له تحت شهواتي.. مثل ما لعب الشيطان براسه لعب براسي آنه بعد ..
نزلت سناء راسها على ركبتها .. وقعدت تصيح من كل قلبها .. وبسيل قامت تهديها ..
بسيل: بسج سناااء .. حرام اللي تسوينه الحين بروحج ..
سناء: حياتي كلها حرام في حرام .. كلها حرام في حرام ..
بسيل حست ان سناء المفروض الحين ترتاح .. لأنها تحس ان نفسيتها تعبت ومو قادرة تكمل ..
بسيل: خلاص سناء .. انتي روحي الحين غرفتج وارتاحي .. وازورج باجر ..
هزت رأسها سناء بمعنى اوكي ..
بسيل: اتحملي بروحج ..
اختفت سناء من قدام عيون بسيل .. لأنها راحت الى غرفتها .. وبسيل بدورها قامت وراحت الى الدكتورة مرة ثانية .. وطقت الباب ..,,
الدكتورة: ادخل
بسيل دخلت بكل هدوء ..
الدكتورة: شصار؟؟
بسيل: ولا شي .. بس سناء تعبت شوي واعتفست حالتها وقلت لها تروح ترتاح .. وحبيت ازورج قبل لا امشي .. واقول لج مع السلامة واشوفج باجر ان شاء الله ..
الدكتورة: ان شاء الله .. والله يسلمج ..
ابتسمت بسيل ومشت في الممر لما وصلت الى بوابة المستشفى اللي دخلت منها .. وركبت سيارتها .. وهي تقول ببالها .. مسكينه يا سناء .. شنو اللي يمكن يؤثر على البنت ويدهور نفسيتها .. اكبر من انها تخسر شرفها !!.. بركنت السيارة في باركات المجله .. ورجعت مكتبها مرة ثانية ..
ريم: هلاااا والله
بسيل: هلا بيج
ريم: ها بشري؟؟
بسيل: دخلت اليوم مع اول قضية يمكن تطرح بإسمي في المجله ..
ترنيم قامت من على كرسيها وطلعت ..
بسيل: شفيها؟؟
ريم: ما ادري فيها .. زين شنو بتكون القضية ؟؟
بسيل: للحين ما اتضحت القضية كلها .. بس صاحبة القضية بتكون بنت ..
ريم: زين زين بالتوفيق لج
التفتت بسيل الى ريم مرة ثانية: بالتوفيق للجميع .. وانتي شمسويه ؟؟
ريم: حصلت لج جم خبر للفانين .. ومن هذي الفضائح اللي الناس تموت فيها ..
بسيل: ههه .. أي والله كثري فضائح عشان يركضون وراء اللي تكتبينه ..
ريم: ههه
وراحت بسيل مكانها .. وقعدت ترتب الكلام اللي دار بينها وبين سناء اليوم على الورق اللي قدامها .. وهي مندمجة مع اللي تكتبه .. وقفت على راسها ريم ..
ريم: يالله بسيلووووو مو كل يوم بتتأخرين لي في نهاية الدوام
بسيل: ههههه فديتني .. الحين بقوم نطري شوي بس .. بكمل اللي بإيدي ..
وقفت ريم ولمحت كلمه ...فتحت عيونها على الآخر وقعدت تقولها بصوت عالي: اغتصبني واستسلمت له تحت شهواتي !!..
بسيل: بسم الله الرحمن الرحيم .. شفيج؟؟
ريم: مدري الكلام .. ليه دخل بالقضية؟؟
بسيل هزت رأسها بمعنى أي ..
ريم: بيه الله يستر شالسالفه بس!!
بسيل: قلت لج ما ادري بالسالفه كلها ..
وقامت بسيل دخلت اوراقها بالدرج .. وقفلت عليهم .. وحملت شنطتها: بس لا تستغربين .. لأن يا كثر السوالف اللي جذي هذي الأيام ..وبالأول والأخير السالفه بتنزل بالمجلة .. واول وحدة بخليج انتي تقرأينها .. وابتسمت لها: نمشي؟؟
ريم: يالله نمشي ..

طلعوا ثنتينهم من المكتب .. ومن المجله كلها .. واتجهت كل وحدة إلى سيارتها .. اللي كانوا اليوم صوب بعض ..
بسيل: يالله مع السلامة
ريم: مع السلامة ..
وركبت كل وحدة سيارتها وشغلتها ومشت .. واتجهوا الى بيتهم .. وصلت اسيل من بعد 25 دقيقة من زحمة الشوارع هذا الوقت .. دخلت البيت .. وراحت بشووق الى امها اللي بالمطبخ اكيد هذي الحزة .. ولوت عليها من وراها وباستها ..
بسيل: فدييييييتج ماماتي شلووووونج اشتقت لج ..
ام باسم: ههههه قومي مناك عني .. اشتقتين لي وانتي تركضين تبين تروحين الشغل ها ..
بسيل: شسووووي بعد .. ما كنت ادررري إني ببتعد عنج هالوقت كلـه ..
ودخل عليهم هني باسل ..
بسيل: حررررة اليوم وصلت قبلك
باسل: يالله خيرها بغيرها
بسيل: ههه يالله اخليكم بروح اغير ثياااابي .. واصلي ..
باسل: نطريني بروح وياج .. وركبوا على الدرج مع بعض ..
باسل دفع بسيل على وراء بحيث انها بتطيح بس طبعاً هو حط ايده من وراها ..
بسيل وقفت للحظة ..,,
بسيل: بااااااااسلوووووو
باسل: ههههه عيونه
بسيل: أخااف لا تسوي لي جذي مرة ثانية ..
باسل: متملل قلت اسوي شي يونسني ..
بسيل: يونسك ويخوفني؟؟
باسل: فديتج .. زين آخر مرة
بسيل: ولا تفكرر حتى تعيدها مرة ثانية ..
باسل: ههههه
ومشى كل واحد منهم كمل طريقة الى غرفته ..,,
دخلت بسيل وغيرت ثيابها .. وغسلت .. وصلت صلاة ربها .. وقرأت لها شووي من القرآن .. ونزلت لقت بس امها اللي قاعده تنتظرهم على السفره ..
بسيل: وينه باسل؟؟
وصل باسل في هذي اللحظة: انا هنـــي .. فديت اختي اللي تسأل عنـي
بسيل: شسوي فيك اسأل عنك ..
وقعدت وحتى باسل قعد .. وسموا بإسم الله .. واتغذوا << روتينهم اليومي ..,,

جمعتهم على الشاي بعد الغذاء ..
وصلت باسل مكالمة واستأذن منهم وقام .. وظلت بسيل قاعده مع امها .. حطت راسها على رجول امها ..
ام باسم: شفيج يا بنيتي احسج كل ذبلانه هالأيام؟؟!!
بسيل: مافيني شي يمه .. بس يمكن مو متعودة اقوم بشغلي هذا كل يوم .. ولا تخافين علي بس بداية الأيام اكيييييد .. وبعدين من قال لج آنه تعبااااانه .. بالعكس احس إني مرتاحه .. ومرتاحع وايد بعد
ام باسم: اتمنى لج الراحه .. والله يوفقج في شغلج ..
وقعدت ام باسم تمسح على راسها ..
ام باسم: ما قلتين لي اليوم شسويتين؟؟
قعدت بسيل تسرد لأمها كل اللي صار لها بالمستشفى ..
ام باسم: واعلياا عليها هالبنت .. والله انها كسرت خاطري .. وهذا ولد جيرانهم صج ان ما يستحي على ويهه ..
بسيل: شفيج يمه .. بس البنت بعد استسلمت له !! .. وما كان لازم تروح معاه بيتهم !!..
ام باسم: لا حبيبتي .. البنت ضعيفة
بسيل: لا مو كل البنات ضعاف
ام باسم: ما اقصد لج ان البنت ضعيفه .. بس لما تصير بين ايد رجل اكيد بتخضع لقوته عليها .. وبعدين با بنتي الصبي قال لها ان امه واخته معاه بالبيت والله نسيتي هالشيء؟؟ .. وهي راحت معاه اكيد لأنها توثق ببيت جيرانهم .. والغلط الأول والأخير على ولد جيرانهم .. لأن هو اللي لبس الغلط ولبس معاه البنت .. صح يمكن تكون البنت غلطانة يوم انها راحت معاه .. بس هو اللي بدوره اقنعها .. وخلاها تروح معاه بيتهم وخلاها بعد تستسلم له لما حاول ان يغتصبها .. واستخدمها كفريسة .. وعمر الفريسة ما تضيع من ايد المفترس بسهوله .. صح والله لا ؟؟
بسيل: صح .. بس تصدقين يمه يقطع القلب منظر البنت .. حبيت اعرف شنو اللي صار فيها من بعد اللي سواه ولد جيرانهم فيها .. والسبب اللي وصلها الى مستشفى الطب النفسي .. بس قلت بخليها ترتاح لأنها تعبت وباجر اكمل معاها ..
ام باسم: يالله .. الله يكون بالعون يا بنيتي ..
حركت بسيل راسها على رجول امها بدلع .. وهي تفكر .. لهذي الدرجة القضايا يكون فيهم غموض!!..

اذا تبون تعرفون شنو سالفة سناء ونهايتها .. انتظروني في النصف الثاني ..,,
يتبع ..,,
النصف الثانـــي من البارت الثاني ..,,

~*¤ô§ô¤*~البارتـ الثانــيـ~*¤ô§ô¤*~


قعدت بسيل على غير عادتها اليوم .. تطالع الساعه اللي صوبها ..
بسيل: لااا الساعه 6 ونص !!! .. حتى صلاة الفجر ما قعدت لهااا ..
قامت مو عارفة شتسوي ..
بسيل: اففف ليش ماماتي ما قعدتني ..
راحت على الدرج تنزل .. وهي تصرخ ..,,
بسيل: مامااااتي .. باااااااسل .. ماماتي .. باسل ..!!
طلعت ام باسل من المطبخ ومعاها باسل .. خافوا من صراخها فيها شي !!
ام باسم: شفييييج؟؟
بسيل: ليييييش ما قعدتووووني .. الحين ما بيكفي الوقت اتجهز .. بتأخر على الشغل
باسل: عبالي الحين فيج شي .. مع صراخج هذا .. يالله انا بمشي الحين لا اتأخر انا الثاني عن شغلي
ام باسم: وين روح تريق عدل
باسل: شبعت يمـه .. بس بحمل كوب الحليب ويااااي
وراح باسل اخذ كوب الحليب واخذ مفتاح السيارة وياه ..
باسل: يالله مع السلامة
ام باسم: في حفظ الله يا وليدي
بسيل قعدت على الدرج: اووووه وآنه شسوي يعني!!
ام باسم تقربت منها: فديتج قومي تجهزي في وقت ..
بسيل: بس بروح متأخررة اعرف
ام باسم: اففف منج يوم واحد بتتأخرين ما صارت هذي .. قومي تجهزي لا تتأخرين اكثر .. قومي بجهز لج اغراضج وبتجهزين بالسرعه ان شاء الله يالله اشوف ..
قامت بسيل وركضت الى غرفتها .. ودخلت تاخذ لها شور .. وامها من صوب ثاني طلعت لها ثياب وكوتهم لها .. ونزلت تسوي بخور ..
بسيل طلعت من الحمام لقت ثيابها مجهزين ..
بسيل: فديييتج ماماتي والله .. هههه والله تعرفين تجهزين بعد !!..
ولبستهم .. كانت تنورة بنيه .. وعليها قميص من تحت .. ومن فوقه جاكيت فيه حركة .. وصلت الصلاة اللي اليوم أخرتها !!.. ولبست من بعدها الشيله .. وجهزت لها شنطة باللون البيج .. وحملت تلفونها ونزلت تحت كانت الساعه 7 وعشر دقائق ..
بسيل: تسلميييييين ماماتي
ام باسم: على شنو؟
بسيل: على الثيااب اللي جهزتينهم .. تعبتج وياي ..
ام باسم: بلا كلام فاضي اشوووووف .. وتعالي اتريقي
بسيل: لا لا لا اتأخرت المفروووض اكون الحين هناك
ام باسم: ما اخليج تطلعين من غير ريوق ..
بسيل تعرف امها وعمرها ما تخليهم يطلعون من غير ريوق .. التفتت الى صحن السندويش: زين ماماتي باخذ سندويشة .. والحليب ..
وسحبت لها السندويشة والحليب ..
بسيل: يالله مع السلامه ..
وباست امها على راسها وطلعت ..
ام باسم: لا تنسين البخوور بالصاله
بسيل: زيييين انج ذكرتيني ..
وطلعت اتبخرت بالسرعه .. ولبست لها نعال باللون البني .. وركبت سيارتها .. واتجهت الى شغلها .. وكل ما توقف في اشارة تاكل شوي .. وصلت بعد ثلث ساعه ..
بسيل: رحت فيها اليووم ..
نزلت وهي تمشي بالسرعه .. ودخلت مبنى الشغل وركبت الى مكتبها فوق ..
بسيل: سلااااااام
ريم وترنيم: عليكم السلام
بسيل: شخباركم
ترنيم هني ما ردت ..
ريم: بخير وانتي؟
بسيل: بخير دامج بخير يالغلاااااا
ريم: شفيج متأخرة اليوووم
بسيل: راحت علي نوووووومة
ريم: ههههههه اقول آنه هذي اللي متحمسة للشغل وتبي تاكله تغيب من ثالث يوم
بسيل: احم لااا حبيبتي مو بسيل اللي تغيب عن شغلها ..
ريم: صح اليوم بتروحين المستشفى بعد؟؟
بسيل وهي تحط شنطتها في الدرج وتطلع الأوراق: أي صح .. وبعد شوي بمشي ..
ريم: زين زين
بعد فترة..,,
ريم: بسيل براويج شغلي وقولي رأيج
بسيل: عطيني اشوف
ريم مدت لها اوراق عشان تشوفهم ..
بسيل قرأت صفحتين تقريباً: زين بس مافي صور تشجع؟؟
ريم: ضروري صور؟؟
بسيل: أييي عشان الموضوع يجذب الناس من الصور اللي فيه .. ومو أي صور .. صور صارت بالحدث .. او تناسب الحدث
ريم: شكراً بسوووله ..
بسيل: ولكموو ويالله آنه اخليج الحين .. عشان الحق على موعدي بالمستشفى
ريم: بالتوفيييق ..
بسيل: تسلمين ..
طلعت بسيل .. وطول الطريق وهي تتذكر الكلام اللي دار بينها وبين سناء .. ونزلت لما وصلت على باب المستشفى .. وكملت طريقها الى غرفة الدكتورة اللي تعرفها .. وطقت الباب ..
الدكتورة: ادخل!!
فتحت بسيل الباب بإبتسامتها اللي ما تفارها: سلام
الدكتورة: عليكم السلام .. يا هلا .. دخلي تفضلي ..
دخلت بسيل وقعدت: شخبارج اليوم؟
الدكتورة: الحمد لله على كل حال محد تاعبنا غير ضغط الشغل ..
بسيل: ههه الله يعينج ..
الدكتورة: وانتي شلونج؟
بسيل: بخير الحمد لله ..
الدكتورة: انادي لج سناء؟
بسيل: أي اذا ما عليج امر ..
الدكتورة: تعالي معاي عشان آخذكم للغرفة اللي قعدتوا فيها امس مرة وحدة ..
قامت بسيل .. ومشت وراء الدكتورة وين تروح!!.. وقلبها يتقطع الف مرة من المناظر اللي تشوفها هناك .. ليما وصلوا الى غرفة من الغرف اللي كلهم تتشابه .. ودخلت من بعد الدكتورة .. كانت الغرفة ظلاااام .. مافيها ولا سلالة ضوء .. حتى الستارة ما كانت مفتوحة .. وباردة .. وكأنها ثلج من المكيف .. تقربوا اكثر الدكتورة وبسيل .. وفتحوا الليتات .. لقوا سناء قاعده على سريرها وضامة رجلينها وحاطة راسها في وسطهم .. ومغمضة عينها .. بس لما فتحوا الليتات حاولت تفتح عينها بكسل !!..
بسيل: يصير اكلمها هني .. واعرف منها كل شيء في غرفتها؟؟
الدكتورة: براحتج ..
بسيل: خلاص .. مشكورة عشان انج وصلتيني لها .. وتعبتج وياي .. وافضل اقعد معاها هني .. اذا ما فيه مانع طبعاً !!
الدكتورة: ما فيها شيء ... وما اوصيج عليها
بسيل وهي تأشر على عينها: سناء في عيوني
الدكتورة ابتسمت وانصرفت عنهم .. راحت بسيل الى الستارة وفتحتها .. وسناء كانت تفتح عيونها بكسل من الضوء اللي كل ما له يزيد ويقتحم غرفتها .. تقربت بسيل منها ..
بسيل: شخبارج اليوم
سناء: الحمد لله على كل حال ..
بسيل: شفيج ؟؟
سناء: اهلي ..
بسيل: شفيهم
سناء: محد يزورني ولا يسأل علي .. كلهم نسوووني .. حتى امي اللي كانت تزورني بالاسبوع مرة .. صار لها اسبوعين ما سألت علي .. وبدأت سناء تصيح .. تقربت منها بسيل وحضنتها بكل حنان ..
بسيل: فديتج الام ما عمرها تقدر تبتعد عن ضناها .. وبعدين اكيد صار عندها ظروف عشان انها ما زارتج .. وبعدين آنه وين رحت ؟؟ .. ما أملي عينج ؟؟
سناء ارتسمت على ويهها ابتسامه باهته ..
تباعدت عنها بسيل: وبعدييين قومي بلا كسل .. ابيج تكملين لي الاحداث .. والله مو ناوية ؟؟
سناء: لا اكيد ناوية .. واحاول اليوم اكمل لج كل الاحداث اللي تبينها ..
بسيل: فديتج .. تسلمين والله
سناء: يسلمج ربي .. ويوفقج
بسيل: يالله نبدأ
سناء هزت رأسها بمعنى أي ..
بسيل قعدت مقابل سناء: زين .. من بعد استسلامج .. شصار؟؟
سناء بتنهيده: صار اللي صار .. ومن بعده قعدت اصيح آنه في زاوية من المجلس .. وهو يطالعني بنظرات براءة .. آآه ياليت كنت احصل البراءة بأفعاله مو بنظراته .. قمت ولملمت اللي بقى من كرامتي .. وشنو اللي بقى بالأساس عشان يبقى .. لبست شيلتي .. واي شيله بتسترني ذاك الوقت !!.. وحملت شنطتي .. وكنت بطلع .. بس وقفني صوت فيصل ..
فيصل: آسف على اللي صار ..
تكرر صدى كلمة آسف ؟؟!!... آسف .. آسف .. يا سهلها عندك يا فيصل !!.. نزل نظره للأرض .. وهو ليه عين يرفع عينه عشان يرفعها!!.. حاولت افتح الباب بس مقفول ..
سناء: خلاص .. حصلت اللي تبيه .. وخضعت لك فيه .. وين المفتاح اللي يحررني الحين؟؟
فيصل قام وفتح لي الباب .. وآنه طلعت بكل هدوء وصمت .. وتقربت من بيتنا وشفت الباب الخارجي مفتوح ..
ضحكت سناء ضحكة استهزاء ووجهت نظره ميته الى بسيل: تصدقين !!.. تفتحت الأبواب بويهي من بعد ما تسكرت بقلبي .. وكملت كلامها ..
سناء: دخلت البيت .. ولقيت امي تنتظرني على نار .. تقربت مني وآنه احاول ابتعد عنها !!..
ام يوسف: وينج يا بنتي خوفتينا عليج ..
كنت اقول بقلبي .. تبيني اقول لج وين كنت!! .. انتوا اللي وين كنتوا عني !!..
اضطريت اجذب على امي اللي عمري بيوم ما جذبت عليها: مشى الباص عني .. واضطريت اروح بيت رفيجتي وحاولت اتصل البيت بس محد رد .. ووصلتني من بعد ما تغذينا مع بعض ..
ام يوسف: خوفتينا عليج .. وبعدين زين انج رحتي بيت رفيجتج .. اختج طاحت علينا واخذناها المستشفى .. واخوج بالشغل .. ونسينا حتى نترك لج المفتاح ..
ماهمني كل الكلام اللي قالته لي امي .. شنو الكلام اللي بينقال عني لما يعرفون باللي صار !!..
سناء: يمـه آنه تعبانه ابي ارتاح شوي .. اروح؟
ام يوسف: روحي ارتاحي واعليه عليج .. وين ما بتتعبين وسط هالشمس ..
ما صدقت ان امي قالت لي روحي ارتاحي .. كنت اتخطي الدرج بخطوات واسعه .. عشان بس اوصل الى غرفتي .. اللي يمكن تتقبلني وهذي حالتي .. من اليوم صرت انسانه بدون شرف .. شرفي راح .. ورحت وياااه .. ورحت وياااه .. وقعدت اصيح بحسره .. ولا أحد داري فيها ..,,

مر شهر وآنه خايفة من اللي يمكن يصير ويفضح اللي كنت ساترتنه بثيابي .. سناء خلاص بالبيت وبالمدرسة وبكل مكان ماتت من ذاك اليوم .. واللي يبقى الامل في حياتها .. ماعندها غير انها تناجي ربها .. وتستغفره .. مر شهر من بعد الشهر الأول .. وصاروا شهرين .. فقدت أملي .. خلاص .. وصرت من يومها فتاة بلا أمل .. دراستي اللي كنت متفوقة فيها صرت ارسب بالمواد .. وحالتي ما تسر لا عدو ولا رفيج .. ظهري بيتقطع علي .. واحس بطني يألمني ولأول مرة أحس بالألم هذا فيه .. كانت عيني تألمني بشكل مو طبيعي .. وألم راسي ما يرحمني دقيقة .. وصرت آنه بصوب والأكل بصوب .. واذا كليت شيء ما تمر دقائق الا ورجعته .. حتى امـي لاحظت لي .. ووصل اليوم اللي كنت خايفة اواجهه وواجهته لكن ..,,

قعدت على الغذاء لكن ما قدرت اتحمل الألم اللي كان يعتصرني .. قمت .. تركت كل شيء من ايديني وقمت .. وقامت وراي امي الى غرفتي ..
ام يوسف: شفيج يا بنتي صار لج ايام حالج مو عاجبني ..
سناء: ها .. لا بس تعب وبروح ..
ام يوسف: لا هذا مو تعب وبروح وقومي غيري ثيابج ولبسي شيلتج ونروح المستشفى ..
سناء: يمه ماليه داعي نروح المستشفى
ام يوسف: لا له داعي .. وقومي يالله اشوفج قدامي ...
قمت وآنه اجني على نفسي بكل خطوة اخطيها .. بس اذا ماعرفوا اليوم بعرفون باجر .. شنو يفرق اليوم والله باجر .. لبست ثيابي وحطيت شيلتي على راسي .. ونزلت الصاله لقيت امي توصي اختي قبل لا تطلع ..
ام يوسف: احنا بنطلع مع اختج مريضة بناخذها المستشفى .. وانتي بالبيت هني وعندج اخوج يوسف .. مو تطلعين من البيت زين؟؟
مرام: ان شاء الله يمه ..
والتفتت امي علي: يالله مشنا ..
طلعت آنه مع امي .. ومع ابوي .. كنت اتمنى اموت قبل لا يصير أي شي في حياتي .. ما ابي أي شيء يضايق امي وابوي .. اللي شقوا وربوا وتعبوا عشاني .. وفي النهاية .. نهايتي تكون صفحة سوداء !!.. اخذوني المستشفى .. ومو أي قسم .. قسم الطوارئ .. ليش!!.. عشان نهايتي تقرب وتدنى لي اكثر من ما هي قريبه لي ؟؟ .. فحصوا علي .. وقعدت مع امي وابوي ننتظر على الكراسي اللي في قاعة الانتظار .. وقام ابوي من بعدها يروح ياخذ النتائج .. في ذيك اللحظة دموعي اللي تنزف من داخلي ما قدرت ما تنزف قدام الناس كلها ..
ام يوسف: شفيج يا بنيتي .. ان شاء الله خير ..
ترددت الكلمه ببالي: خيـر !! .. خيــر ..
قلتها وآنه اعرف ان الخير ابعد من البعد نفسه عني: ان شاء الله ..
تقرب ابوي وشفت في نظرات عيونه الانكسار .. الخذلان .. تقرب مني .. وقالها ..
ابو يوسف: ليش؟؟
ذاك الوقت ما اهتميت لأحد دموعي بدأت تنزل مثل الشلال .. طحت قدام ابوي ..
سناء: سامحــــني يبـه سامحنــــي .. والله ما كان بيدي الشيء ..
صرخ ابو يوسف صرخه هزت معاها المستشفى كلها وصاروا محط انظار الناس: ليــــــش سويتين اللي سويتينه .. هذي آخر التربية ؟؟؟؟؟ .. هذي آخر التربية ؟؟ .. يا مسودة الويه سودتين بويهي معاااج .. هذي آخر التربية ؟؟ .. وقام يضربها بأقوة ما عنده ولا كان يحس بشيء .. وكأن يطلع اللي بقلبه كله فيها .. كان ياخذها بكفوف .. ويرجعها للأرض اللي هي عليها بكفوف ثانية .. والناس كلها التمت اللي بقاعة الانتظار .. وحاولوا يفرقون ابو يوسف عن بنته .. وام يوسف اللي ما كانت فاهمة اللي يصير .. وشنو اللي بخلي ابو يوسف يغضب هذا الغضب كله !!.. من بعد ما فرقوهم ..
تباعد ابو يوسف عنها وقعد على اقرب كرسي له .. وهو يناظر ايده بإستغراب .. اللي عمري ما مديت ايدي على عيالي فيها .. اليوم امدها عليج يا سناء .. كان مستغرب من اللي سواه .. بس مستغرب اكثر من اللي سوته بنته !!..
تقربت ام يوسف الى رجلها .. تحاول تسأله ..
ام يوسف: شالموضوع ؟؟ .. فهمووووني؟؟ .. لييييش تقسى على بنتك ليش؟؟
ابو يوسف:........!!
تقربت ام يوسف بكل حنان الى بنتها ونزلت لمستواها .. اللي كان شكلها كأنها انسانه ميته .. وتصيح بكل حسرة والم .. مو عشان ضرب ابوها لها لااا .. كل الألم اللي فيها من داخلها .. كاتمته من شهرين .. واليوم يزيد اكثر واكثر ..
ام يوسف: قومي يا بنيتي شفيج ؟؟ .. شصاير ؟؟ .. قومي الناس تطالعج من كل صوب ..
سناء ومن بين دموعها: يمـه آنه آنـ ـ ـه ه .. حامل ..
ام يوسف تطالعها بنظرات استغراب !!!
سناء حركت لأمها راسها بمعنى أي ..
ام يوسف تنهدت تنهيده .. ووجهت نظرها الى رجلها .. بس ما سوت اللي سواه ولا صاحت .. ومافي الا كلمات على لسانها: حسبـي الله ونعم الوكيل .. حسبـي الله ونعم الوكيل .. حسبـي الله ونعم الوكيل ..

اتمنى الموت ولا اشوف هذا حال امي .. اتمنى قبري يلمني ولا اشوف حالة ابوووي .. الموت بعذبني مرة .. لكن الحين .. اتعذب مليون مرة على اللي سويته .. مشيت معاهم بصمت وآنه احس إني انسانه بينهم منبوذ منها .. ركبت السيارة .. كنت خايفه من الأيام وشنو اللي ترسمه لي باقي ايامي !!.. واستغربت من ابوي اللي حتى ايده ما مدها علي .. ياليته يذبحني ولا يخليني بعذابي .. وصلنا البيت .. ونزلت من السيارة مع امي وابوي .. دخلوا البيت وظليت واقفة بره .. في شيء اكيد يمنعنى ذاك الوقت .. الا هو فيصل اللي كان واقف ويسولف مع الشباب قدام باب بيتهم وضحكته موصله لآخر العالم .. ولا كأنه مخليني ضحية زماني .. دخلت وراء امي وابوي .. وتلاقينا مع اخوي بالصاله .. واختي الصغيرة ..
ام يوسف: مرام حبيبتي روحي غرفتج
مرام: لييييش؟؟
ام يوسف: روحي غرفتج وخلاص ..
غمضت عيوني وقلت خلاص .. البداية كانت مع ابوي وامي و نهايتي على ايد اخوي بتصير!!... كنت بمشي .. بروح غرفتي .. بهرب من الناس .. من العالم .. بهرب من نظراتهم لي .. بهرب من الحيااااة كلها .. بس وقفني صوت امي ..
ام يوسف: وقفي مكانج ..
التفت لها بنظرات ترجي .. وبخاطري اقول لها يمه تكفين .. ارحميني !!.. بس اكيد ما كانت تسمعني .. وكملت كلامها وهي تناظر اخوي ..
ام يوسف: يوسف اختك حامل ..
يوسف عمره ما كان قاسي علينا .. عمره ما رفع حتى صوته علينا .. لكن ذاك اليوم .. حتى كف ايده طبعه على خدي .. مو مرة!! .. مرات .. وامي وابوي كأنهم راضيين بهذا الشيء .. اكيد راضيين !! .. وحدة مثلي تستاهل اكثـر من اللي قاعده احصله .. وصلت لحظة ما قدرت استحمل كل شيء .. كل شيء حولي .. وصرخت في ويه الكل .. لا شعورياً ..,,
سناء: تكفــــــون .. اذبحوني .. بس كفاية لا تعذبووووووني .. كفاية لا تعذبوني ..
ظليت اضرب روحي كأني مجنونه في ذاك الوقت .. وامي كانت تهديني .. هدأت شوي .. وكلهم هدءوا وياي .. وكأنهم يرأفون بس لحالتي دقائق!! .. وكأنهم يبون ياخذون مني اللي يبونه وبس .. كلهم ينتظروني اتكلم !!.. يبون يعرفون شلون وليش آنه حامل .. هذا السؤال اللي بعيونهم .. قلت لهم كل اللي صار بذاك اليوم من رديت من المدرسة الى وقت رجوعي الى البيت .. ومع كل كلمة انطقها لهم .. اتألم اكثر واكثر .. ختمت كلامي بتنهيده .. و ..
سناء: والحين آنه حامل .. ومن ولد الجيران فيصل ..
ورجعت لحالتي الهستيرية في الصياح ..,,
يوسف دارت فيه الدنيا .. اقرب الناس له .. يخونه ومع اخته!!..
اخذني يوسف اخوي بكل قسوة .. وسحبني من شعري الى غرفتي .. ورماني مثل أي قطعة منبوذ منها ..
يوسف: من اليوم ورايح هذا مكانج ..
قفل علي باب غرفتي .. وأخذاه معاه .. ما كان بيدي اسوي أي شيء .. كل اللي سويته إني تركت دموعي تنهمل بكل سهوله .. مدري على شنو اصيح .؟؟.. على حالي والله على شبابي والله على امي وابوي واخواني .. كل اللي اعرفه بذاك الوقت ان دموعي كانت تنزف من روحي ..!!,,

راح اخوي يوسف الى فيصل .. اللي كان واقف مع ربعـه ذاك الوقت ..,,
يوسف ويحاول يحافظ على هدوئه: فيصل ابي اكلمك بموضوع ..
كل الشباب استأذنوا ومشوا عن فيصل ..
فيصل: زين اتكلم بالموضوع
يوسف وهو يرص على اسنانه: مو حلوة نتكلم بالشارع
فيصل وكأن حاس بالشيء اللي بقوله من نظرات سناء اللي دخلت بيتهم ودموعها .. ومن شكل يوسف اللي يبان عليه ان معصب .. ولو بيده الحين يذبح فيصل !!..
دخل فيصل .. ودخل معاه يوسف الى المجلس ..,,
يوسف: شنو اللي بينك وبين سناء؟؟
فيصل: سناء؟؟
يوسف: أي سناء
فيصل: أي سناء؟؟
يوسف: سناااااااء اختي والله ماتعرفها بعد
فيصل وهو يبلع ريجه: ايييي اختك لا لا اعرفها .. من الصغر ..
يوسف: اعرف انك تعرفها .. بس شنو اللي بينك وبينها؟؟
فيصل: يوسف شفيك ؟؟ .. ما بيني وبينها شي ..
يوسف تقربت الى فيصل والشرار يتطاير بعيونه وقبض على قميصة بقووة: فيصل .. سناء حامل ..
فيصل: شنوووو .. سناء حامل؟؟
يوسف: أي حامل منك .. ومافي حل غير انك تتزوجها ..
فيصل: بس آنه ما جست اختك عشان حامل مني ..
يوسف: كلامي يوصلك ويتعداااك .. بتتزوجها يعني بتتزوجها ..

وطلع يوسف من عند فيصل .. في ذاك اليوم .. وفيصل ما لقى حل في باله غير انه ينحاش .. خلاص .. فيصل سافر .. او تقدرين تقولين هااااجر .. يعيش بغربه ولا ياخذ وحدة مثلي .. وآنه عشت ايامي اسيرة ببيت ابوي .. خسرت شبابي .. خسرت اهلي .. خسرت دراستي .. وعلى راسهم شرفي .. كنت عايشة بالدنيا وآنه ميته .. 24 ساعه بغرفتي .. ومقفول علي .. ما احصل غير الاهانه .. والكلام اللي يزيد عذابي عذاب .. ما احصل غير الاكل اللي يدزونة لي من الباب .. من يومها ما عادت تعني لي شي الحياة .. عفت الزاد .. وعفت الدنيا كلها .. ويوم إن خلاص هذي عيشتي .. الموت ارحم لي .. في يووم لعب براسي الشيطان اكثر واكثر .. واليأس صار يحتل مكان الأمل بكل ذراته .. فتحت الادراج اللي بغرفتي .. مالقيت غير الحبوب اللي يمكن يفيدني بهذا الوقت .. كليته كله .. وهذا آخر شيء اتذكره قبل لا اطيح بغرفتي .. وما وعيت الا وآنه بالمستشفى .. وامي على راسي تقرأ آيات من القرءان .. ومن فتحت عيني هملت دمعي معاها .. وحست لي امي .. قامت ومسحت على راسي بكل حنان .. حسيت شكثـر إني محتاجة للحنان .. بس ما استاهله .. باعدت ايدها عني وصديت للجهه الثانية ..

ام يوسف: الحمد لله على السلامه ..
سناء: يمـه ليش ما مت ؟؟ ..
ام يوسف: لأن الله كاتب لج تعيشين ..
سناء: بس آنه ما ابي اعيش .. ما ابي ..
ام يوسف: ليش انتحرتين ؟؟ .. ليش تبين تموتين ..
سناء: لأن الموت والعيش بالقبر .. ارحم من الموت والعيش بالهجر ..
تقربت مني امــي ولوت علي .. وتباعدت عني ..
ام يوسف: سناء
سناء: ....؟؟
ام يوسف: انتي حاولتي تنتحرين .. الحمد لله على انج بقيتي لنا سالمه .. بس اللي ببطنج مات .. سقطتين !!
سناء تقول ببالها .. حتى الشيء اللي يمكن يربطني بفيصل راح!!..
طلعت امــي .. واي ام يهون عليها تشوف حالة بنتها مثل حالتي !!.. فتاة يائسة .. فتاة بلا حياة .. عايشة وآنه ميته .. وعدم وجودي اريح بوايد من وجودي .. شبقى فيني عشان أمـي تسميني بنتها ؟؟ .. كل ام تحلم ان تربي بنتها احسن تربيه .. كل ام تتمنى لبنتها الخير وتاخذ رجال .. رجال يسعدها ويستر عليها ببيتها .. بس آنه !!.. وآه من الزمن .. لا الزمن يرحم ولا الناس ترحم .. صارت سالفتي انشودة ببيوت جيرانا كل من يغنيها على الطريقة اللي يحبها .. وهذي آنه .. من يوم ما حاولت إني انتحر هذا مكاني .. والحمد لله إن نفسيتي تحسنت وايد وايد عن قبل .. بس بعد حياتي صارت بدون هدف .. فيصل من يومها ترك البلاد وسافر .. الى وين الله اعلم !!.. ومافي شيء في حياتي انتظره غير الموت .. بس الموت وينه !!.. حتى يوم إني مشيت ليه بنفسي تركني ..,,

بسيل: احمدي ربج يا سناء .. صدقيني بعدج احسن من غيرج .. كنتي ضحيه للمجتمع ولواحد من الذئاب اللي عايشة فيه .. الحمد لله على كل حال .. وبعدين ليش تتمنين الموت ؟؟ .. عيشي حياتج .. استغفري ربج .. وادعيه بقلبج .. واذا كل الناس تخلوا عنج .. ربج ما بيتخلى عنج .. وهذي الدموع اللي ما توقف من عينج .. عمرها ما بتفيدج .. ما بتفيدج الا صلاتج وقيامج .. صار اللي صار .. وراح اللي راح .. وضاعت ايامج اللي راحت .. بس لا تضيعين الوقت اللي بقى لج في حياتج .. اذا ضاقت فيج الدنيا .. اخذي القرءان بإيدج .. واقرأي صفحاته .. تمعني في كلماته .. وهذا ما يعني نهاية الدنيا اللي صار لج .. انتي المفروض تكملين حياتج عادي .. كل انسان منه تولده امه عشان ينتظر يوم موته .. بس مو بهذي الطريقة .. سوي لج اعمال صالحه .. تفيدج في آخرتج .. وما اظن إني اول شخص يقول لج هذا الكلام ..
سناء: بس !!
بسيل: لا بس ولا شيء .. انتي المفروض تغيرين حياتج خلاص .. رجعي لهم سناء القبليه .. وفرحي اهلج فيج .. صدقيني كلهم يعرفون السالفه .. وكلهم فاهمين وبقدرون موقفج ..
سناء: احــاول
بسيل: عفيــه .. ومشكورة على انج فتحتي لي قلبج واللي فيه .. وادري تعبتج وياي
سناء: انتي اللي مشكورة عشانج سمعتين كل كلمة قلتها .. لأني اذا شكيت للناس همي احس براحة شوي .. بس عمري ما حسيت براحه كثر ما يوم اشكي لج .. حسيتج تفصلين كل حرف اقوله ..
بسيل: فديتـج ..
وراحت بسيل حضنت سناء .. وسناء قعدت تصيح بحضنها ..,,
بسيل تباعدت من بعد فتره: خلاص اوعديني تحسنين حالتج شوي .. وتحاولين انج تنسين اللي صار .. واعتبريها نقطه سوداء مرت في حياتج وخلاص؟؟
سناء: بس النسيان صعب .!!
بسيل: زين ما قلنا شي .. حاولي ..
سناء: اوعدج
بسيل: شكراً
سناء: على شنو؟
بسيل: على الوعد ..
وهني ينفتح الباب ..
ام يوسف: السلام عليكم ..
بسيل وسناء: عليكم السلام ..
قامت بسيل وقفت ..
وام يوسف تقربت من سناء بنتها ..
ام يوسف وهي تلوي على بنتها: شخبارج يمــه
سناء: بخير وينج عني؟؟
ام يوسف: مرضت يومين وما قدرت ازورج ..
سناء: مريضة؟؟
ام يوسف: كنت بس تشوفين الحين قدامج ورده مفتحه ..
سناء وهي تضحك على امها .. اللي مهما كبرت وكلامها بظل مثل كلام الشباب: فديتج يا احلـــى وردهـ مفتحه انتي ..
ام يوسف مستغربة من سناء اليوم .. تضحك .. وتحسها غير: وماعرفتينا على الحلوة اللي وياج ..
بسيل: آنه رفيجة سناء ..
ام يوسف: يا هلا بيج ..
بسيل: يالله آنه استأذن الحين ..
وراحت بسيل باست سناء في خدها ..
بسيل: وما اوصيج على روحج .. زين
سناء: ان شاء الله ..
بسيل: يالله مع السلامه .. وتحملي بروحج .. واشوفج على خير ..
سناء: شوي شوي علي .. ههه .. الله يسلمج .. وانتي بعد تحملي بروحج .. وعلى خير ان شاء الله .. ولا تنسينا ..
بسيل: مكانج بالقلب .. واتقربت بسيل من سناء: واول ما انزل الموضوع بالمجله بجيب لج وياها اوكي؟؟
سناء ابتسمت لها: اوكي
بسيل: ويالله خاله مع السلامة ..
ام يوسف: مع السلامة يا بنيتي ...
وطلعت بسيل عنهم ..
ام يوسف: والله باين عليها انها طيبه وبنت ناس ..
سناء: وهي مثل ما قلتين طيبه وبنت ناس ..

طلعت بسيل واتجهت الى دوامها اللى باقي عليه ساعه ونص وينتهي .. نزلت وراحت الى مكتبها .. وبدأت تسرد باقي الأحداث اللي صارت في حياة سناء ... بس الوقت ما كان كافي انها تكمل كتابه اللي بإيدها ..
وترنيم بس وصل نهاية الدوام طلعت من المكتب وكأنها تبيها من الله ان الدوام يخلص .. لكن بسيل كالعاده على راسها ريم في نهاية الدوام ..
ريم: هي حالج كل يوم تتأخرين؟؟
بسيل: فديتج .. الحين بقوم ..
ريم: للحين ما كملتين كتابة القضية الأولى؟؟
بسيل: لا باخذها معاي البيت وبكملها هناك .. خبرج اجازة الحين جمعة وسبت .. فـ بكملها بالبيت احسن ..
ريم: زين اخذي معاج الفايل وكملي هناك .. بس ارجووووج قومي تعبانه ابي اروح البيت ..
بسيل: ههه
وقامت بسيل حملت معاها الفايل اللي فيه الأوراق .. وحملت شنطتها ..
بسيل: يالله على البيت ..
ريم: واخيـراً ..,,

ومشوا مع بعض عشان كل وحدة تتجه الى بيتها من صوب .. وترسم تخطيطاتها لحياتها اليومية والعملية من صوب ثاني ..,,


انتظـروني مع بسيل .. واحداث جديده .. وقضيه جديده .. في البارت الثالث