~*¤ô§ô¤*~البارتـ الرابعــ~*¤ô§ô¤*~
الفصل الأولـ ..,,


وصلت المكتب وقعدت بكل لهفة على مكتبها بالذات وسحبت المجله اللي كانت قدام عيونها: يــــس ..
ريم تطالعها بنظرات .. وبسيل مو حاسه للي حولها .. وهي تتصفح المجله .. وكانت بتعلن النهاية وان قضيتها ما نزلت !!.. نزلت المجله بكسل وحطت راسها بين ايديها وكأنها طلعت من محاولتها الاولى شبه مهزومة .. وخسرانه !!.. خسرانه!!.. لا لا عمرها بسيل ما تقبل بالخساره .. تقربت ريم الى بسيل وقعدت على طاولتها وفي ايدها مجله!!.. تأففت بسيل اكثر لما شافت المجله مرة ثانية .. وريم تلوح لها فيها قدام عيونها ..
ريم: شفييييج .. ووين وصلتي
بسيل: ما نزلوا قضيتي في المجله !!.. وهذا يعني إنـي ما نجحت.. سكتت ونزلت راسها لأنها مو حابة تكمل .. ولا كانت حابة تقول عن نفسها هذا الكلام !!.. او ان تجربتها الاولى ما نجحت ..
ريم قامت من على الطاوله وتقربت الى بسيل ووقفت يمين كرسيها: بس من قال لج ان قضيتج الاولى وكتاباتج الأولى ما نجحت .. بالعكس .. اليوم الناس كلها عاجبها اسلوبج .. ويمكن تكونين من الاسباب اللي تخلي الناس تشتري المجله عشان تتابع القضايا اللي انتي تتابعينها وتناقشينها ..
التفتت لها بسيل .. وطالعتها بنظرات .. وكأنها مو فاهمة اللي قاعد يصير !!.. بس اللي متأكدة منه ان المجله ما كان فيها شيء بقلمها !.
ريم وهي ترمي عليها المجله: يا حلوه .. المجله اللي كانت بين ايدج .. مجلة الاسبوع اللي راح .. وهذي مجلة هذا الاسبوع .. وموضوعج نازل فيها ولا بعد موضوعاتي نازلين فيها وهذا الاحلى ..,,
بسيل طالعتها بنظرات استغراب .. وشافت ان الغلاف غير .. شافت التاريخ وتأكدت بين الثنتين .. وكأن ابتسامة ارتسمت على شفاتها .. تصفحت المجله بالسرعه وكأنها تبي تتأكد اكثـر .. ووقفت على صفحة القضايا .. واول قضيه .. اغتصبني فأستسلمت له .. يا ناس .. يا عالم .. اللي قاعده اشوووفه حلم .. بس صار حقيقه .. واخيراً .. التفتت الى ريم بنظرة بس ريم خافت منها ورجعت الى مكتبها .. ولحقتها بسيل ..,,
بسيل: رريمووو اكيد سالفة مجلة الاسبوع اللي راح من تحت راسج ؟؟
ريم: لا لا لا
بسيل وهي عاقدة حواجبها: عجل؟
ريم وهي تأشر على اللي دخلت من الباب وتسلم !!..
بسيل مستغربه .. ترنيم !!.. وشلون .. وآنه وهي ما نتكلم مع بعض .. بتوصل فيها تمزح معاي !!.. ومزحه كبيره؟؟ .. وبعدين شنو هذا التغير .. لابسه عبايه !!.. وشيله .. لا لا لا شنو اللي قاعده اشوفه آنه ..
ريم: عليكم السلام
ترنيم وهي نظراتها على بسيل: قلنا السلام عليكم
بسيل: وعليكم السلام!!..
ترنيم تقربت منهم وهي نظراتها على بسيل: ان شاء الله عجبج اللي سويناه !!
بسيل زاد استغرابها اكثر واكثر .. مو معقوله اللي تشوفها قدامها هي ترنيم نفسها !!.. انسحبت من بينهم وبكل هدوء .. عشان انها ما تبي تبين لترنيم ولا شيء .. او عشان انها ما تبي ترنيم تعرف ان اللي فيها فوق الصدمة من تغييرها المتفاجئ؟؟!!.. راحت قعدت مكانها .. وترنيم تطالع ريم بنظرات وكأنها تترجاها تساعدها عشان تكسب بسيل!!.. وريم ابتسمت لها ابتسامة تفاؤل واشرت لها بإنها تروح لها .. وترنيم تقربت من بسيل وقعدت في مستواها..
ترنيم: بسيل .. من اول يوم داومت فيه بالمكتب وآنه احس إني غير عنكم في كل شيء .. حسيت بمكانكم وسط الكل واسلوبكم واخلاقكم وكل شيء يمكن كنت افتقر له!! .. تذكرت لما كنت نفسكم ويمكن احسن منكم .. وضحكت ضحكة استهزاء .. بس الدنيا واللي فيها .. هم اللي غيروني .. وصرت مثل ما كنتي تشوفيني ترنيم الضائعه .. كل يوم اشوفكم شكثر قراب مع ان ما قضينا اسبوع مع بعض .. وشكثر آنه بعيده عنكم .. اتحسف واحس شكثر آنه صغيره قدامكم .. وقدام الكل .. وشكثر آنه مو مرغوب فيني .. صدقيني بسيل .. ارجع ايام البيت اصيح .. ما اصيح الا على حالي .. والى وين وصلت .. بس تدرين قررت .. ومن اليوم بدأت إني احاول إني اكون ترنيم غير .. ابي ارجع لأيام قبل .. ايام زمان .. قبل لا ادخل بطريقي اللي مشيت فيه .. بس ساعديني .. طلبتج تساعديني .. انتي وريم .. ولو بالبسيط .. عشان ما اتراجع عن أي خطوة اخطيها صح .. اخترتكم تكونون اصدقائي من اليوم .. بس انتظر موافقتج مثل ما وافقت ريم وفرحت لي قلبي .. بليز .. ووجهت الى بسيل نظرات كلها رجاء ..
بسيل وجهت نظرها الى ريم ... وريم هزت لها رأسها بمعنى أي .. وبسيل لا شعورياً هزت رأسها بمعنى أي الى ترنيم .. وارتسمت ابتسامه رضا باهته على ويه ترنيم ..
ترنيم: شكراً .. بس ما كنت متوقعه .. ومدت لها ايدها تصافحها ..
وبسيل مدت لها ايدها بتردد ..
ترنيم: اتمنى إني اتغير يا بسيل واكون من اصدقائج المقربين .. واكون اقرب لكم كلكم .. واقرب الى ربي .. وهذا الاهم ..
لمست بسيل الصدق في كلام ترنيم وابتسمت لها ابتسامه يمكن ريحتها !!.. اخذت ترنيم المجله .. وقربتها الى بسيل وهي تتصفح فيها .. وقعدت تفتح لها صفحات .. وهي الصفحات اللي انطبعت فيها مواضيعها .. ولمساتها .. وكأنها قاعدة تدور بينهم من أي صفحة تبدأ حياتها من جديد !!.. وقامت معاهم ريم وكانوا يشكلون احلى ثلاثي .. بس اللي قطع عليهم الجو !!!!!..,,
محمد: احم !
الثلاث نقزوا من مكانهم ..,,
محمد يرفع حاجب وينزل الثاني وبغضب مصطنع: هني مكان شغل لو سمحتون مو مكان سوالف ولا جمعة بنات!!
كلهم كانوا ساكتين بس ترنيم تكلمت وكلها جرأه: اخوي احنا قاعدين نناقش موضوع عشان ننزله بالعدد الجاي .. واظن ان هذا نوع من الشغل .. يعني ما قاعدين نسولف ولا جمعة بنات !!..,,
محمد قاعد يطالعها بنظرات غريبه !!.. وكأن اول مره يشوفها !!.. تفشل من الرد اللي سمعه من ترنيم قبل شوي .. وطلع من غير حتى ما يقول لهم ليش هو الحين جاي لهم !!..
بسيل: اييييه يا عمي على الجرأه
ريم: والله واحرجتييييه يا ترنيموو ..,,
ترنيم اللي انحرجت من الرد اللي ردته وكلام بسيل وريم قامت رجعت مكانها وقعدت تشغل روحها بأي شيء ..,,
بسيل وهي توقف: هههههه يالله آنه الحين وراي مشوار ..
ترنيم بشوية صراخ: انتي ومشاوريج اللي ما تخلص .!!
بسيل: ههه ليش تبين اقعد والله تبين تروحين معاي؟؟
ترنيم: لا بس ما تتمللين وانتي من مكان الى مكان .. نبي نقعد معاج شوي ونسولف
ريم: ايواااا اسمع اسمع .. من اول يوم كلمتها وتبي تقعد معاها .. وبعدين سمعتي شقالوا لج قبل شوي المكان مو مكان للسوالف والجمعه .. مكان شغل .. واتركي البنت تروح تشوف شغلها
ترنيم وهي تلوي بوزها: الله وياج
بسيل: ما اقدر آنه عليكم .. نشوفكم على خير .. مع السلامة
ريم: على خير .. في وداعة الرحمن ..
ترنيم: الله يسلمج من كل شر ..
مشت بسيل وهي تحس براحة .. صح كل يوم تحس براحه بس اليوم غير .. يمكن لأنه ترنيم صارت وحدة منهم وفيهم .. وصارت كإختها الثانيه في المكتب !!.. دخلت على المدير .. من بعد ما ضبطت شيلتها ..,,
بسيل بصوت خفيف: السلام عليكم
ما في رد !!..,,
بسيل اللي انقهرت: احم !
فراس اللي رفع راسه من بعد ما كمل اللي بإيده: هلا عليكم السلام .. تفضلي قعدي ..,,
بسيل وهي تقعد: ابي استأذن عشان اطلع وابدأ في قضية جديدة !!
فراس: بالبداية اهنيج على قضيتج الأولى اللي نزلت .. وبعدين انتي كان عندج قضية ثانية بمستشفى الطب النفسي !!
بسيل: بس كملتها امس !.
فراس وهو يرفع حاجت وينزل الثاني: ما عطيتينا نشوفها !!
بسيل: للحين ما ضبطتها وعلى باجر ان شاء الله تكون عندك!
فراس: خير ان شاء الله .. انتظرها .. بس اليوم بعد بتروحين الطب النفسي؟؟؟
بسيل وهي في قمة الاحراج وهي تعطي وتاخذ معاه بالكلام !: لا بروح مركز الشرطه
فراس وهو فاتح عيونه على الآخر: شنو!!
بسيل بإستغراب: ...!
فراس اللي انحرج من تصرفه: احم .. آسف .. بس الله يهداج اختي وين تروحين مركز الشرطة !!..
بسيل وهي تطالع الأرض وكأنها تستمد القوة منها: آنه ما اشتغلت شغلتي .. وقبلت فيها .. الا وآنه اعرف ان الشغل يتطلب علي ازور هذي الاماكن .. دام إني راضيه اروح .. وآخذ الاخبار من هناك .. واقابل ناس تفيدني بأسرار حياتها .. ليش ما اروح!! .. وبعدين مركز الشرطة مكان حاله من حال غيره .. مافي أي اختلاف إني اروح واقابل لي هناك شخص يفيدني مثل ما افادوني غيره !..
فراس وكأن شوي يقتنع بكلامها: على راحتج بس كأنها صعبه شوي !
بسيل وهي توقف: الحياة كلها صعبه ! .. خلاص اخذت الاذن !!
فراس هز لها رأسه بمعنى أي .. تركته بسيل وهو يسترجع الكلمه !!.. الحياة كلها صعبه .. أي والله !!..,,
راحت بسيل الى المكتب الخاص فيها .. وقلبها يدق بالسرعة مثل سرعة البرق !!.. لأول مرة تواجه شخص ما تعرفه وتقول قدامة كلام شطوله شعرضة .. ضحكت على نفسها واخذت شنطتها وفايلها .. وكانت بتمشي بس عمرها ما تسلم من ريم وترنيم !!..
ترنيم: شفيج رجعتي؟
ريم: صج شفيج؟
بسيل وهي ترفع اغراضها: عشان آخذ اغرااااضي
ومشت عنهم .. واتجهت الى سيارتها اللي تساهم وتشاركها في اعمالها كلها .. وبدأت تسوقها بكل هدوء .. وهي تفكر ببالها .. يعني آنه جريئة كفاية عشان ادخل مركز الشرطة وابدأ افتح قضيه هناك !!.. مثل ما خذتني الجرأه واصطنعتها قدام مديرنا " فراس " خلـني اصطنعها ليما اعتاد على الفكره ..!!.. نزلت من السيارة بقلب يرجف من الخوف .. مركز شرطة !!.. يعني مشاكل .. جرائم .. قضايا !!.. وهذا اللي وصلني الى هني .. دخلت بخطى ثابته وهي تبان عكس اللي بقلبها .. وكأنها صامدة قدام الاحداث اللي تنتظرها داخل .. شافت الشرطه كلهم بنفس اللباس .. ورسمت ببالها نفسها وهي عليها لباس الشرطة .. وارتسمت ابتسامة على شفاتها من افكارها .. ورجعت لواقعها مع صوت واحد من الشرطه .. اللي شافها واقفة من مدة ومو عارفة شنو تسوي !!..
نواف: يا هلا اختي .. اقدر افيدج؟
بسيل: السلام عليكم
هني الشرطي تفشل عشان ان كلمها من غير ما يسلم!: عليكم السلام
بسيل: آنه بسيل من مجلة "..."
نواف وهو يتذكر الاسم لأنه مر عليه من قبل: اييي اتذكرت
بسيل اللي متفاجأة من تصرفه:...!!
نواف حس لها: ههه اتذكر إني اليوم الصبح قرأت لج قضية .. ما شاء الله عليج .. حلو اسلوبج واختيارج للقضايا
بسيل بإبتسامة: تسلم .. وآنه اليوم هني عشاني اخترت قضية من عندكم
نواف: اخترتين ؟؟ .. والله تبينا نختار لج؟
بسيل: لا اخترت قضية أحمد محمد جاسم .. اذا يصير إني اتقابل معاه وآخذ منه احداث قضيته !!
نواف: تفضلي معاي المكتب وانا اشوف لج أحمد .. بس متأكدة ان هو عندنا بالمركز؟
بسيل: أي .. لأنهم دلوني عليه هني !
نواف وهو يفتح مكتبه: ومن اللي دلاج؟
بسيل تقول بخاطرها تحقيق !!: مستشفى الطب النفسي
نواف قعد على الكرسي واشر لها تقعد: اوكي تفضلي اختي وانا بشوفه لج
بسيل: شكراً ..
قعدت تتأمل المكان .. رسمي لأبعد حدود .. مافيهـ الا صور .. ذكريات من ماضي عالم الشرطه .. وقعدت تراقب نواف اللي ارتاحت من شافته معاها طيب ويعتبرها مثل اختها من البداية .. وتشوفه شلون يتكلم بالتلفون عشان يستدعون أحمد له بالمكتب !!.. وقفت افكارها .. لما قال لها نواف ..
نواف: الحين بيوصل .. بس بتفق معاج .. بناخذج غرفة .. وهذي الغرفة بتكونين انتي وأحمد وأحد الشرطة معاكم فيها ..
بسيل بتردد: والشرطي ما بؤثر على أحمد عشان ان يقول سالفته بكل صراحه!
نواف: لا لا.. وبعدين الشرطي ما بحط باله معاكم .. مجرد ان براقبكم !!
بسيل هزت رأسها بمعنى أي .. والحين بس اكتشفت خطورة الموقف اللي بتكون فيه .. لأنها بنت !.. بتدخل وسط اثنين من الشباب !!.. بس الله وياي .. وما بصير اكيد شيء من اللي ببالي .. قامت على هذي الافكار لما شافت شرطي يدخل عليهم ومعاه أحمد .. وشلون الشرطي يقود احمد من ايده بالقوة .. غمضت عينها وفتحتها على صوت نواف..,,
نواف: هذا احمد اللي سألتين عنه!
بسيل ارتاحت شوي لأحمد بس بعد شكله فيه شي!!: سلام عليكم اخوي احمد
احمد: عليكم السلام .. عفواً اختي ما عرفتج؟
بسيل: آنه بسيل من مجلة " .... " .. وآنه هني من طرف مستشفى الطب النفسي .. واظن الدكتورة الهام قالت لك عنـي !.
احمد: أي صح تذكرت ..
نواف وهو يوجه الكلام للشرطي: اخذه والبنت بتكون معاكم .. اترك لهم الوقت اللي يبونه

مشوا بسيل واحمد والشرطي .. الى غرفة اشبهـ بمكان مهجور .. خافت بسيل .. ودخلت معاهم وهي على لسانها تسمي بإسم الله .. وتدعي ربها يعدي يومها على خير .. وعاهدت نفسها آخر مرة تزور مركز الشرطة !. بس الحين ما تبي تنسحب عن القضية بآخر الوقت .. قعدوا أحمد وبسيل على الكراسي اللي كانوا موجودين هناك .. والشرطي كان يراقب الوضع وهو واقف على الباب !..,
بسيل: اخوي احمد .. آنه وصلت الى المكان اللي الحين احنا فيه على امل الاقي القضية اللي بتفيدني وبتفيد الناس منك انت .. لا تخيب ظني فيك !
أحمد هز رأسه بمعنى أي: ان شاء الله
بسيل: نقول بسم الله؟
أحمد: بسم الله .. من وين ابدأ لج؟!
بسيل: من البداية!!
أحمد: بس فيه اكثر من بدايه !
بسيل: ما ادري اللي يريحك !.,
أحمد بتفكير: الله يسلمج .. اللي قدامج هو أحمد .. عمري 20 سنة .. كنت عايش مع اهلي .. بس اكثـر اوقاتي مع ولد عمي الروح بالروح " محمد " .. من واحنا صغار مع بعض .. نخطط مع بعض .. ونمشي لدروبنا مع بعض .. كبرنا مع بعض .. كنا نتجمع ببيتنا يوم .. وببيتهم يوم ثاني .. وهذي هي حياتنا بالبداية .. في ديرتنا .. عندنا " ابو نزار " .. هذا الله يسلمج رجال .. وضحك ضحكة استهزاء .. يمكن يكون اغنى رجال بديرتنا .. الكل ينظر له بإنه اعلى مقام منه بس طبعاً مو بالمقام اللي اقصده انا واللي انتي فهمتيه .. لا .. اعلى مقام بفلوسه .. تقدرين تقولين اغنى الاغنياء .. تفاجأنا انا ومحمد لما شفناه بيوم من الأيام بالشارع قاعدين على باب بيتنا .. وهو يتقرب منا ..,,
محمد: انت تشوف اللي اشوفه؟
أحمد: أي ..
محمد: كل شوي يتقرب اكثر منااا
أحمد: اششش وصل ..
ابو نزار: السلام عليكم
محمد وأحمد وقفوا: عليكم السلام
ابو نزار: شخباركم يا ولادي!
محمد: احنا بخير الحمد لله نسأل عنك
ابو نزار: سألت عنكم العافيه .. ربي يعافيكم ان شاء الله
محمد: الله يعافيك ..
أحمد: خير عمي؟
ابو نزار: الخير بويهكم .. بس بغيتكم بشغله
محمد: احنا تبينا انت بشغله!!
ابو نزار: اذا ما عليكم امر
أحمد: شنو هي الشغله !
ابو نزار: لا ما تسوى اقول لكم الشغله بوسط الشارع .. شرايكم آخذكم البيت واضيفكم بمجلسي .. واقول لكم الشغله هناك!

قمنا آنه ومحمد نطالع بعض بنظرات استغراب .. هزينا له رأسنا بمعنى أي .. ومشينا وراه الى بيته .. كنا لأول مرة ندخله! .. او ندخل بيت مثله !. ولا بالأحلام كنا نشوف لا انا ولا محمد نفسه .. دخلنا وراه بكل ذهول من اللي قاعدين نشوفه .. ابو نزار .. بنفسه يعزمنا انا ومحمد على بيته !.. ويبينا احنا بشغله !!.. دخلنا بيته .. وبالتحديد مجلسه .. وضيفنا .. وقعدنا ساكتين كلنا فتره من الوقت .. انا ما عندي كلام اقوله .. ومحمد نفس الشيء !.. بس هووو !! .. شنو اللي يبي يقوله وللحين ما تكلم .. كنا نشوف التردد في نظرة عيونه .. لكنه نطق وقالها !
ابو نزار: ما حلمتون بيوم تكونون واحد من الاغنياء؟
محمد وأحمد: ...!
ابو نزار: ردوا علي .. جاوبوني؟؟
محمد: ومن ما يبي يكون واحد من الاغنياء !
وجه ابو نزار نظره لي .. وكأن ينتظر جواب مني انا الثاني .. بس اكتفيت بإني اهز رأسي له وكأني أأيد كلام محمد!. وهو " من ما يبي يصير من الاغنياء " ..
ابو نزار: خلاص انا عندي لكم الحل!

وجهنا انا ومحمد الى ابو نزار نظرات مليانه استغراب .. الظاهر اليوم ناوي علينا بشيء !.. بالاول يتقرب منا بالشارع !. وبعدين يعزمنا ببيتهم !. ويضيفنا !. والحين يبينا نكون من الاغنياء مثله !. الله يستر بس!. اثنينا غصنا بأفكارنا .. بس ننتظر ابو نزار ينطق .. ويفسر لنا الكلام اللي قاله قبل شوي .. هذا اذا كان في له تفسير !! ..
ابو نزار:انا بيوم من الايام كنت مثلكم .. يوم انا كنت بعمركم .. او اصغر بشوي .. بس الحمد لله فتحت عيني في الدنيا .. وفكرت شنو اللي يمكن يحسن حالتي واصير صقر بعيون الكل !.. قمت اتاجر بالمخدرات
انا ومحمد فتحنا عيونها على الآخر: مخدرات!!
ابو نزار: أي مخدرات .. وانا اخترتكم عشان تكونون معاي في تجارتي واعلمكم ..
رد عليه محمد بكل اندفاعيه: اذا الغنى صار بالمخدرات الله لا يغنينا
ابو نزار اللي انصدم من ردة فعله: بس انا ما ابيك اليوم ترد لي خبر .. وتشاور انت ونسيبك .. واخذوا الوقت اللي تبونه بس لا تردون الحين ..!

طلعنا انا ومحمد من بيته .. وضحك أحمد بسخرية .. الا هو قصره .. ورحنا الى بيتنا اللي اشبه بعش العصفور .. دخلنا اثنينا بصمت الى المجلس بالتحديد ومكان جمعتنا .. لكن محمد من بعد تفكير طويل كسر حاجز الصمت !.
محمد: سمعته شنو يقول؟
اكتفيت بإني هزيت رأسي بمعنى أي
محمد وهو رافع حاجب ومنزل الثاني: وانت شرايك؟
هزيت له كتوفي بمعنى ما ادري!!
محمد: أحمد لا ترفع لي ضغطي انا اكلمك الحين رد علي مو تظل ساكت وتهز لي راسك وكتوفك وهذا اللي انت شاطر فيه بس .. فكر وياي شوي
أحمد بصراخ رداً على كلام محمد: مو انت قلت خلاص واذا الغنى بالمخدرات ما نبيه !
محمد وجه نظره للأرض: بس !.
أحمد: بس شنو .. انت رفضت .. وخلاص
محمد: لا مو خلاص .. ابي رأيك انت
أحمد: انا ما ادري بين حيره!
محمد كان يوجه لي نظرات استغراب: أحمد .. هذي تجاره .. ومو أي تجاره لكن .. تتاجر بالمخدرات عرفت يعني شنو !.. يعني حياتنا دومها في خطر .. تبي تعيش هذي العيشة ..!
أحمد: بس يا محمد بيتغير حالنا .. شوف احنا شلون عايشين وابو نزار شلون عايش .. من كيس واحد مخدرات شوف شنو يطلع .. واحنا اللى نشتغل ليل نهار عشان بس ندفع للدراسة والشهاده .. دراستنا وشهادتنا ما نبيها اذا الشغله توفرت لينا من غيرها .. وغير مصروف البيت بس .. اللي بالموت اقدر أدبره وأصرف على اهلي .. ليش نرفس النعمة وهي واصلتنا الى باب بيتنا ؟!.
طالعني محمد بنظره وكأن اللي في بالي في باله: بس يا أحمد نمشي بطريق الخطأ واحنا ندري ان خطأ ؟؟ .. عمره ما كان الخطأ في الحياة من اختصاصنا ..
أحمد: بس وصل اليوم ان احنا نتاجر بالخطأ .. مو عشان شيء .. بس عشان نبي نعيش مثلنا مثل غيرنا من الناس .. ونعيش من غير ما نذل روحنا لهذا وذاك ..
محمد تساند على الجدار: وبعدين .؟
تساندت صوبه على الجدار واحنا قاعدين: تتذكر لما كنا صغار .. واحنا نشوف ابوي وابوك الله يرحمهم يذبحون روحهم بس عشان يحصلون لنا لقمة عيش ناكلها .. نعيش واحنا مو ضامنين رزق باجر .. نذل روحنا للي يسوى واللي ما يسوى .. تتذكر لما قعدنا عند ذيك الزاوية .. وتعاهدنا لما نكبر نغير حالنا ونعيش حياتنا مثل الناس !. هذا احنا كبرنا والى الحين ما قدرنا نحرك من قدرنا شعره .. ليش ما نبدأ ونفتح ابواب لحياتنا .. دام ان المفتاح صار عندنا ؟؟ ..
محمد: ...

مرت 3 ايام من كلمنا في الموضوع ابو نزار .. وفي اليوم الثالث زرناه ببيتهم .. وما انكر ان هو استقبلنا احسن استقبال .. واحسن من المرة اللي راحت ..
أحمد: خلاص انا واحمد قررنا نبدأ تجارتنا معاك!
قلتها ولساني في كل كلمه يقطها يثقل اكثر .. ادري ان اللي قررناه خطأ .. بس شسوي اذا كان في حياتنا الخطأ صح!.,


بدأنا رحله جديدة .. وخضنا حياة جديدة .. بس سرعان ما تعودنا عليها !.. تخلينا عن البيت اللي كان يجمعنا .. تخلينا عن اهلنا اللي صرنا بس نقط عليهم فلوس ونطلع عنهم .. اكثر اوقاتنا نجتمع بشقتنا !!.. شرينا شقه عشان نتستر على روحنا وعلى اللي نتاجر فيه .. داخلها .. كانت راقيه لأبعد حدود .. عكس حياتنا قبل .. عجبتنا الحياة الجديدة ما ننكر .. وخصوصاً لما بدأنا تجاره جديده من بعد ما صارت مشاكل مع ابو نزار .. وحبينا نكمل الطريق بروحنا .. لأن بالراحه نكسب آلاف تريحنا .. غرتنا الدنيا .. وغرنا كل شيء فيها .. ومرت علينا الايام والشهور .. واخذنا تقريباً سنتين واحنا في هذا الطريق .. اهلنا استغربوا من تغيرنا المفاجئ بالنسبه لنا ولهم !.. من تجار صرنا نتعاطى المخدرات !. وصرنا نسكر بنص الليل .. هذي هي كانت حياتنا .. بس ما كان احد منهم يعرف عشان يمنعنا وهذا اقل شيء .. وصل يوم .. تمنيت فيه ان شريط الحياة يرجع فيني للوراء شوي واحذف اللحظة اللي رحنا فيها لأبو نزار واحنا متخذين قرار الموافقة عشان نوصل للي وصلنا له .. لكن كل شيء صار وخلص .. في ذاك اليوم جن جنوني وجنون محمد .. كان 50 كيلو مخدرات ضائع !.. وهذي الشقة محد عايش فيها غيري وغيره!.. كنا في حالة سكر .. وهذا اللي زاد الموقف .. كان يتهمني بإني انا اللي بقته !.. وانا بدوري ارد عليه الاتهام .. صار بينا هواش خفيف بالبداية .. آخر شيء قطاني على وراء .. وراسي طق الطاوله .. حست بألم فظيع .. لكنه ما منعني إني امد يدي فوق الطاوله وآخذ السكين اللي كانت هناك .. واتقرب منه عشان آكل من لحمة .. من بعد صراخ وهواش .. قدرت اغرز السكين في قلبه .. مثل ما هي للحين مغروزة بقلبي قبل قلبه .. ضحكت وقتها .. مدري !.. ضحكت على حالي !.. والله على انتصاري في ذاك اليوم؟!. طالعته بنظرات وهو في آخر انفاسه .. وانا اتأمله .. ولد عمي !. صديق دربي !. هذي نهايتنا تكون مع بعض !.. ما همني احد في هذي اللحظة حتى هو .. كنت افكر بنفسي .. صرت اناني وما افكر الا بنفسي !.. رحت الغرفة وخذيت الفلوس اللي تكفيني منها .. وفتحت باب الشقة اللي كانوا معظم سكان عمارتنا متجمعين هناك .. وقفت للحظة .. اسكر الباب وادخل مرة ثانية !.. والله اكمل هروبي من الشقة ومن العمارة ومن المنطقه كلها!!!.. كملت قراري بهروبي ونظرات الناس كلها علي .. اللي اجتمعوا على باب الشقة من الصراخ اللي سمعوه!.. دخلوا كل الناس من بعدي وكل واحد مستغرب من اللي قاعد يصير داخل .. وآخرتها تكون داخل جريمة قتل !!.. في يومها انكتب علي اكون مجرم .. اكون قاتل .. نزلت دمعه خانته .. ومو بس قاتل .. قتلت اقرب الناس لي ولقلبي .. والسبب كله الفلوس !.. صج ان الفلوس وسخ دنيا .. صار التحقيق وكل شيء يدل على إني المجرم واللي سرق واحد من طرف ابو نزار وهذا اللي اكتشفوه!! .. وما نكرت إني مجرم .. لأن ما فيه ولا وسيلة اقدر انكر فيها اللي صار .. حسيت للحظة ان الزمن كله ضدي .. من صغري الى كبري .. ندمت على ايامي اللي ضيعتها في تجارة الخراب .. ندمت على اهلى اللي ضيعتهم وضعت بدونهم .. ندمت على عصيان ربي في كل ذيك الساعات .. ندمت عشان إني خسرت انسان كان ولا زال غالي !!.. شفيد الندم؟؟.. والحين شنو حصلت !.. السجن .. واهل عمي يطالبوني بالثار !.. " الثار بالثار" ..يعني خلاص انكتب علي الموت .. وكأن ربي ما يبيني امشي بدرب من غير صديق دربي ولد عمي .. واكيد بلحقه عن قريب دام ان الثار يبعد عني مستحيل !!.. وانتهت قصة حياتي وانتهيت انا معاها !

ابتسمت له بسيل وكأنها تواسيه على اللي صار وبصير له !..
بسيل: انت غلطت والمفروض تتحمل عواقب غلطك .. المفروض ايامك هذي ما تقضيها بالتفكير باللي مضى .. المفروض تنسى او تتناسى كل شيء صار .. وتتقرب لربك اكثر .. وتستغفر ربك على اللي سويته ..
هز أحمد راسه بمعنى أي !.,
بسيل وهي توقف: وآنه ان شاء الله اساعدك باللي اقدر عليه .. واحاول ابان صورتك للعالم انك ضحية مثلك مثل ولد عمك مثل ناس وايد غيركم .. والحين استأذن عشان الحق اروح للمكتب قبل لا ينتهي الدوام ... وما اوصيك اللي صار ماضي .. لا تضيع الحين وقتك جذي وتقرب الى ربك اكثر.. عشان ما تخسر آخرتك مثل ما خسرت دنياك ..

طلعت بسيل وتقول ببالها .. صح !!.. احمد كان ضحيه لأبو نزار .. وفي ناس وايد ضحايا .. خصوصاً بزمننا هذا .. يالله بس الى وين بنوصل في هالدنيا ..!!. ركبت سيارتها وراحت الى مقر شغلها .. الا هو مكتبها !!..


الفصل الثاني ..,,

~*¤ô§ô¤*~البارتـ الرابعـ~*¤ô§ô¤*~

وصلت بسيل الى مكتبها .. وبإبتسامه باهته يبان فيها التعب ..,,
بسيل: سلااااام
ترنيم وريم: عليكم السلام
ريم: ها بشري
بسيل وهي ترمي ثقلها كله على الكرسي: اففففف سكتوا سكتوا .. اول ما دخلت مركز الشرطة .. حسيت روحي بموووت .. خفت خوووف .. يمكن لأني اول مرة اروح مركز الشرطة ..
ترنيم وريم كانوا يسمعونها بإنتباه وكأنها تقول لهم قصة .. وقفت للحظة بسيل عن الكلام .. وضحكت على اشكالهم ..,,
ترنيم اللي رجعت نظرها للأوراق اللي بين ايدها: اوووه بسيلووو
بسيل: ههههههههه فن اشكالكم يا ربييي .. بس صج ما كانت اتوقع إني قدها هالتجربة .. لكني خضتها ..,,
ريم: فديييتج قدها وقدود .. بعد باجر بتروحين؟
بسيل وكأنها ما صدقت خبر: لا لا .. شنو اروح .. بس لو يعطوني قضية بالآلاف واروح لها مركز الشرطة ما اروح .. يخوووف يا ناس .. يا عالم .. تخيلي يمكن مافيه الا آنه بنت .. بين رجال .. غير ان المكان يخررع كأنهم بحكمون عليج بالإعدام .. ببساطة .. ما ابي اعيش التجربة مرة ثانية ..
ترنيم: ههههههه زين محد طقج على ايدج من البداية وقال لج روحي
ريم: أي صح
بسيل: شسوي .. مسويه في روحي سوبر مان
ريم: لا انتي مو سوبر مان سوبر ومن ..,,
بسيل: خفيفه هي هي هي ..
ريم: ماااالت
بسيل: زين شرايكم اليوم نتجمع ؟
ريم: في وين؟؟
بسيل: في بيتنااااا
ترنيم: خلاص صار
ريم: شنو شنو انتي تقررين بدوني
ترنيم بنظرات خوف الى ريم:.!!
ريم اللي تضحك على شكل ترنيم: ههههه فديتج والله .. آنه بعد مواااافقه ..
بسيل: خلاص اليوم العشاء عندي
ترنيم: لا شنو عشاء .. نبي بس جمعة بنات من غير الرسميات وغيرها ..
ريم: لا شنو بس قعدة بنات .. نبي عشاء
ترنيم: افف منج لازم تغثين البنت
بسيل: افااا .. لا مغثة ولا شيء ..وبعدين ما يصير بس جمعة بنات .. بسوي لكن ذاك العشاء اللي ما كليتوا مثله بحياتكم ..
ريم: احم..
ترنيم: تحتاجين أي مساعده ؟؟
بسيل: ترنيم وايد مكبرره الموضوع .. هو عشاء لا غير !!.
ترنيم: هههه خلاص على راحتج .. عرضت خدماتي عليج بس انتي رفضتي
ريم: وآنه اشهد ..
بسيل: آنه ابي ريم تسوي معاها شيء ..
ريم: لا حبيبتي ما بسوووووي
بسيل: بل بل بل عليييج
ترنيم: صج انج بخووول يا ريمو ..
ريم: افا بس افا .. آنه اتطنز معاكم .. واذا تبون العشاء كله علي ..
ترنيم: نزل الكرم ..
بسيل: هههههه لا حبيبتي .. مرة ثانية العشاء عليج .. هالمرة ببيتنا وعلي آنه .. وانتظركم اوكي .. وشافت ساعتها .. وكان الدوام انتهى من عشر دقائق .. ويالله قوموا يا حلوين لأن تأخرناااااا ..
قاموا كلهم .. ورتبوا المكتب على السريع .. وحملوا شنطاتهم وفايلاتهم اللي ما يستغنون عنها .. وطلعت كل وحدة الى سيارتها .. اللي بتحملها الى بيتها ..,,
وصلت بسيل البيت .. والتعب كاسي جسمها .. ومو قادرة حتى تحمل روحها من التعب .. فتحت باب الصاله بتعب .. ورن موبايلها بنفس الوقت .. دخلت وقعدت على الدرج وطلعت موبايلها .. ما صدقت خبر على طول ردت !.. والتعب كله اللي تحس فيه راااح بمجرد انها ردت على التلفون !.
بسيل: هلا بسوووووم .. هلا بأبو جوجو .. هلا بأهل الكويت .. هلا ..
قاطعها باسم: بس بس بس
بسيل: هههه ارحب فيك .. احمد ربك وبوس ايدك قدام ووراء عشان إني بسيل بنت امها وابوها ترحب فيك
باسم: يا كرهج لما تكثرين هدره ..
بسيل: ازعل عليك الحين
باسم: كل شيء ولا زعلج فديتج .. وين امي .. دقيت البيت محد رد!!.
بسيل: مدري عنها توني آنه رادة البيت .. بس تدري لحظة بشوفها لك بالمطبخ
باسم: زين
قامت بسيل وهي تكلم اخوها: ما قلت لنا شخبارك .. شخبار ام جوان .. وشخبار جوجو ؟؟
باسم: كلنا بخير يا ويه الخير انتي .. وانتي شخبارج ..
بسيل: بخير دام انكم بخير ..
بسيل وهي تدخل المطبخ وتشوف امها: سلام علييييكم
ام باسم وهي تلتفت لها: عليكم السلام ..
بسيل: شخبارج يالغاليه .. وراحت لها تبوسها .. وسمعت صوت باسم بالتلفون !!.
باسم: كأنج نسيتيني ؟!
بسيل: ومن يشوف الوردة ما ينسى الكون كله ..؟؟
ام باسم: تكلمين من؟
بسيل وهي تمد لها الموبايل: حبيبي
ام باسم تطالعها بنظرات استغراب واخذت التلفون عشان تشوف!: الو!.
باسم: فديت الألو لا طلعت منج
ام باسم: باسم
باسم: عيونه
ام باسم وعينها دمعت: فديت عيونك .. شخبارك يمه شلونك .. شخبار ام جوان وجوان ؟؟
باسم: كلنا بخير يالغاليه نسأل عنج
ام باسم: سألت عنك العافيه .. عاد وينكم زورونا .. من زمان ما نشوفكم !!
باسم: احاول نمر عليكم خلال اسبوعين ان شاء الله .. بس ارتب اموري بالشغل شوي .. الا وين باسل؟
ام باسم: للحين ما رد من الشغل
باسم: سلمي عليه واااايد لما يرد .. وسلمي لي على بسوله .. ويالله اخليج
ام باسم: الله وياك .. واتحمل بروحك .. وبزوجتك وبنتك .. وسلم لي على ام جوان
باسم: يوصل يالغاليه ..
ام باسم: يالله في وداعة الرحمن
سكروا الموبايل على صوت باسل: سلام عليكم يا اهل البييييت
ام باسم: وعليكم السلام
بسيل: وعليكم السلام يا اهل الشارع .. وطلعت له لسانها ..
باسل: افاااا بس افا !.
بسيل: هههه فديتك والله .. على فكره انت الداخل البيت واحنا الطالعين .. وغمزت له بعيونها ..
باسل وهو يفتح الثلاجة: احم خلاص سامحتج .. شنو كنتو تتكلمون فيه قبل لا ادخل !!.. اعرفكم ما عندكم الا الحش فيني
بسيل: هههه لا تطمن .. كنا نكلم باسم ..
باسل وهو رافع حاجب ومنزل الثااني: تكلمونه!
بسيل: أي متصل على الفون
باسل: يعني .. وليش ما عطيتوني اكلمه
ام باسم: ما كنت هني!
باسل وهو يحك راسه: أي صح!!
بسيل: الحمد لله والشكر بس .. اروح ابدل ثيابي .. احسن من خبال بعض الناس ..
باسل: بسيلو
بسيل: تنادي روحك!! ههه
وطلعت عنهم
ام باسم: يسلم عليك باسم
باسل: الله يسلمه..,,
رجعت لهم بسيل: يمه اليوم عازمة بنات على العشاء ..
وطلعت من المطبخ تكمل مسيرها الى غرفتها ..
×
.
×
وصلت الى غرفتها وقعدت على سريرها بتكاسل: آآآآآه ..
ورن موبايلها في نفس الوقت ..
بسيل: اففففف من اللي فاضي يتصل !!
واخذت تلفونها من الشنطة .. وردت بالسرعه .. كأنها ما تبي اللي متصل يقطعه!: هلا والله .. مسااااء الورد والفل والياسمين والروز يا احلى سوسو بالدنيا كلهاااا
سارة: شوي شوي .. اذوني بتروح منج انتي ..
بسيل: مالت بس مالت .. الحين ارحب فيج وهذا جزاي !!
سارة: ههه عاد انتي تركتي شيء اقوله لج .. زين .. هلا بالعسل يا عسل
بسيل: هذا اللي قدرتي عليه؟!
سارة بنبرة تفكير: يس
بسيل: مالت ..
سارة: شخبارج يالقاطعه .. لو ما احنا نتصل مافي حتى مسج
بسيل: شسوي يا سويرة .. شغل في شغل في شغل في شغل
سارة وهي تقاطعها: بس بس بس عافانا الله .. آنه بعد اشتغل
بسيل: صج؟؟؟
سارة: احم احم .. أي
بسيل: وفي وين؟!
سارة: في مجلتكم
بسيل وهي تنقز على السرير: حلفييييي؟
سارة: احلف بالله انها جذبه
بسيل: يبي لج احد يكفخج ..
سارة: ههه شسوي فيج بعد .. زين اشتغلت في شركة اتصالات ..,,
بسيل: ايوا يا عميي .. اتصالات بعد .,
سارة: شنسوي !!.. مالقينا الا هناك شغله .. وقلنا عاد نشتغلها .. والحمد لله ..
بسيل: الحمد لله على كل حال ..
سارة: زين ما قلتي لنا شخبارج؟
بسيل: بخير وانتي؟
سارة: بخير دامج بخير ..
بسيل: دووم ..
فترة صمت .,’
بسيل: سويرة
سارة: عيونها
بسيل: تسلم لي عيونج .. سمعي .. اليوم عازمة لي بنتين من اللي يشتغلون معاي بالمكتب .. شرايج تشاركينا جمعتنا
سارة: لا ما اعرفهم ولا يعرفوني .. وبعدين ما بياخذون راحتهم اكثر لما اكون موجودة .. لأنهم مو معتادين علي .. وبعدين آنه متصلة عشان اقول لج ليلة باجر نبي نطلع شرايج؟؟
بسيل: اوكي خلاص براحتج .. عاد وين نروح ليلة باجر؟!
سارة: ابي اروح السيف .. من زمان ما نروح مع بعض هناك .,’
بسيل: يصير خير ان شاء الله .,
سارة: يالله اخليج روحي اتغذي
بسيل: هههه والله يا سارة بطني بموووووت من الجوع
سارة: مو انتي متى قلتي شبعانه ..,
بسيل: جب جب
سارة: هههه يالله بالعافيه مقدماً .. واشوفج على خير ..
بسيل: على خير .. تحملي بروحج
سارة: وانتي اكثر ..
سكرت سارة عن بسيل .. وبسيل قعدت تفكر في حياتها شوي !!.. من قبل ما كنا آنه وسارة جذي مع بعض .. ليش الحين كل ما تمر الايام نبتعد!! .. وقفت من التفكير على صوت طقة الباب ..
بسيل: مـــــن
باسل: انا يالله يا اختي بنموووووت واحنا ننتظرج
بسيل: هههههه فديتك انت انزل واكمل تبديل وصلاة وانزل لكم
باسل: عجلي شوووي
بسيل: ان شاء الله ..

قامت بسيل وبدلت ثيابها .. ولبست برمودا ابيض ومكتوب من وراء باللون الاخضر .. ولبست عليه تي شيرت باللون الاخضر .. ورفعت شعرها مثل ذيل الحصان .. وحطت لها ريشة باللون الاخضر .. وصلت .. ونزلت لهم لاقتهم قاعدين ينتظرونها على السفره !..
بسيل: الله يهداكم لو تغذيتون يعني !
ام باسم: لا تكثرين حجي .. وقعدي وقولي بسم الله
تقربت بسيل وقعدت بمكانها المعهود: بسم الله !.
وقعدوا كلهم ياكلون بصمت .. مثل ما اعتادوا عليه كل يوم ..,,
×
.
×
اذن المغرب وكل وحدة لاهية بشغل من صوب .. بسيل اللي كانت تنتظر الكيك اللي تسويه بالفرن يجهز عشان تكمل تزيينه بعدين .. وامها اللي كانت تسوي الشاي والقهوة ..
ام باسم: يمه روحي صلي صلاة ربج واتجهزي .. وآنه اكمل كل شيء ..
بسيل: لا يمه بس تجهز الكيكة بطلعها وبروح اصلي .. واتركي انتي عنج الشاي والقهوة وروحي صلي ..
ام باسم: الشاي وجهز باقي القهوة بنتظرها تجهز واروح اصلي ..
بسيل ونظرها على الفرن اللي فيه الكيك: وآنه بعد الكيك جهز بطلعها وبروح اصلي وبعدين ازينها ..
وكل وحدة كملت اللي بإيدها من صوب وراحت تصلي ..,,
ومن بعد الصلاة .. نزلت بسيل تزين الكيك .. ووصلت امها المطبخ بعدها بفتره ..
بسيل بإبتسامة: تقبل الله
ام باسم: منا منج .. وقومي اتجهزي وآنه اكمل كل شيء
بسيل: يمه .. شعرفج الله يهداج تزيين كيك
ام باسم: هههه بشخبطها لكم بالكاكاو وخلاص
بسيل: ههههههه فديتج .. ماباقي شيء واكملها ..
ام باسم: عجل بجهز الأكل بصحون كبار .,’
بسيل: تسلمين يالغاليه ..
وتركت بسيل القفشة اللي بإيدها: وهذي الكيكة وجهزززت ..
واخذتها للثلاجه: يالله اخليج يمه واروح اتجهز
ابتسمت لها ام باسم وبسيل راحت عشان تتجهز قبل لا يوصلون ترنيم وريم .,!..
اسرعت بخطواتها على الدرج شوي .. واصطدمت بأخوها باسل .. وزين ان مسكها قبل لا تطيح ..,,
بسيل: بسم الله الرحمن الرحيم
باسل وهو يدفعها على وراء بمزح: شايفه جني والله جني؟
بسيل بنظرات ترجي: باسلوووو .. لا تطيحني ..
باسل: ههه وانا مجنون عشان اطيحج ..
بسيل: فديتهم آنه اللي قدامي
باسل وهو يتساند على الحديد اللي بيمين الدرج: بسووله
بسيل: عيونها
باسل: من بجي الليله؟؟
بسيل بنظرات خبيثة: خخخخخ ما بجون بعض الناس
باسل: افا ليش؟
بسيل: بس ..
باسل كان بينزل .. بس وقفة صوت بسيل ..,,
بسيل: بس باجر بنروح آنه وهي مجمع نتسوووق
باسل التفت لها: صج؟
بسيل هزت رأسها بمعنى أي ..
باسل: يعني في مجال اشوفها؟؟
بسيل بنبرة تفكير: يمكـــن
نزل باسل من غير ما يرد عليها وراح الى امه اللي بالمطبخ قاعدة توزع الاكل بالصحون .,’
باسل: مساء الخير يا ويه الخير انتي
ام باسم: مساء النور والسرور يا ويه النور انت
باسل: فديتهم اللي يقلدون انا
ام باسم: الحين آنه امك تقول لي اقلد عليك؟
باسل: ومن قال؟
ام باسم: مدرررري .. الا شعندك كاشخ وين رايح؟
باسل وهو يقلد على بسيل اذا تكشخ وتنزل تدور بوسطهم .. ودار دوره حول نفسه: يمه شرايج ؟
ام باسم اللي فهمته: ومتى بتجوووز عن حركاتك؟
باسل: باجر الصبح
ام باسم حركت رأسها بأسى من حال ولدها: من يصدق انك كبرت وبتصير معرس
باسل: وان شاء الله لقيتي العروس قبل لا اقول بعرس؟ .. والله وحدة خطبتني لبنتها ..؟
ام باسم: هههه انت بس قول بعرس والعروس جاهزة ..
باسل: بعرررررس بس وينها العروس !_!
ام باسم: بنشوف لك وحدة من صديقات بسيل اللي اليوم بزورونها ..
باسل فاتح عيونه على الآخر .. لأنه امه كانت فاهمته: يمـــه
ام باسم: قول يمـه
باسل بنبره حرج: يمـه!
ام باسم: هههه فديتك قوم عني بس ..
باسل: بس بالاول قولي لي اسم العروسة عشان اصدق روحي شوي !!
ام باسم: بعد من غيرها .. فديتها سويرة ..
باسل وهو يبوس امه على راسها: فدييييتج يالغاليه .. يالله تشااااو
ام باسم: تشاو عليكم!
باسل: هههه يا ويل حالي منج .. زين مع السلامه
ام باسم: الله يسلمك .. بس ما قلت لي وين رااايح؟
باسل بصراخ لأنه بره الصاله: يمـه بروح لربعي .. وبعدين ما يصير اقعد بالبيت وربع بسيل بزورونها .. وشوي شوي اختفى صوته .. لأن طلع من البيت ..,,

بسيل وقفت محتارة .. شلبس! .. آخر شيء استقرت على جينز اسود ومايل في الوسط للون الابيض .. وعليه بدي حلوو باللون الاسود .. وفي حركة باللون الابيض .. ولبست حزام على الخصر باللون الابيض فيه سلاسل متدلية منه باللون الاسود .. وما حبت تحط لها ميك آب .. لأنها عزيمة عاديه لا غير!.. حطت لها بس فونديشن .. وقلوز شفاف .. وكحل باللون الابيض من داخل وتحته باللون الاسود .. ورفعت شعرها بكلب بيضاء .. واللي نزلت منه بعض الخصلات .. ورشة لها من عطرها البسيط .. ووقفت قدام المنظره ..
بسيل: احم احم فديتني قمرررررررر.. وطيرت لروحها بوسه في الهواء للمنظره .. ونزلت تشوف امها شنو سوت ..
ام باسم بس شافتها: ما شاء الله علييييج .. يبي لج شبه عن الحسد ..
بسيل: هههههه يمه من اللي بتحسدني ريمو والله ترنيمووو بالله عليج ..
ام باسم: فديتج ماتبين بخورج؟
بسيل: وينه سويتيه؟
ام باسم: لا بس اذا تبين بقوم اجهز لج
بسيل: ما يحتاج يالغاليه حطيت لي عطر وخلاص .. الا قولي لي تبين مساعده؟
ام باسم وهي تقعد: لا فديتج .. كملت تجهيز كل شيء ..
وهني ينطق الجرس ..
بسيل وهي تلتفت لباب المطبخ: اكيد وصلوا ..
وراحت تركض تفتح الباب من بعد ما حطت شيلة لها على راسها ..,’
ريم: السلام
بسيل: عليكم السلاااام والرحمه
ريم وهي تبوسها: شخبارج؟
بسيل: بخير وانتي؟
ريم: بخير دامج بخير
بسيل: الا وين ترنيم ؟؟
ريم وهي تمد الحلاوة بإيدها الى بسيل: تقول ان هي بالطريق .. يعني الحين بتوصل ..
بسيل: ليش مكلفة على روحج ؟!
ترنيم من وراهم عند الباب: لا كلافة ولا شيء ..
ومت هي الثانية الحلاوة اللي بإيدها لبسيل وباستها ..
ترنيم: سلام عليكم
بسيل وريم: عليكم السلام
ترنيم: بسيل طاردة ريم من بيتكم؟!
بسيل تطالعها بنظرات استغراب: لا ليش؟!
ترنيم: هههه اشوفكم مصيفين عند الباب ..
بسيل وهي توها انتبهت: تفضلوا دخلوا البيت بيتكم ..

دخلوا كلهم .. وقعدوا بالمجلس .. كان مجلس بيت بسيل بسيط للآخر .. فيه جلسة على الارض .. بس كان مرتب لآخر حدود .. دخلوا ريم وترنيم الى المجلس .. وقعدوا صوب بعض !,’
بسيل شالت الشيلة من على راسها: عسى بس ما ضيعتوا بيتنا؟!
ترنيم: آنه عن نفسي .. بكل سهوله عرفت طريقه
ريم: وآنه بعد .. لأن ما يضيع بيتكم
بسيل: حلوو .. مو لأنه بيتنا
ضحكوا ترنيم وريم على بسيل .. وهني دخلت ام باسم ..
ام باسم: حي الله من جانا .. زارتنا البركه ..
وقفوا ريم وترنيم عشان يسلمون على ام باسم ..,’
ام باسم: شحالكم .. عساكم بخير ؟
ترنيم وريم: بخير خاله نسأل عنكم
ام باسم: سألت عنكم العافيه ..
ريم: الله يعافيج ..
ام باسم: يالله اخليكم تقعدون على راحتكم ..
ترنيم: وين خاله قعدي ويانا شوي ..
ام باسم: بروح غرفتي ارتاح لي شوي .. يالله مع السلامة
ريم من بعد ما طلعت ام باسم وجهت كلامها لبسيل: هذي امج؟
بسيل: أي ..
ترنيم: تصدقين انها تشابهج ..
بسيل: قصدج آنه اشابهها
ترنيم: صح صح
ريم: الله يخليها لج .. باين عليها طيبه وحلووه
بسيل: ويخليييج .. الطيبة كلها فيهااااا فديتها ..
شافوا ترنيم سرحت شوي !!
بسيل: ترنيم شفيج؟
ترنيم بإبتسامة باهته: بس تذكرت امي
بسيل: شلون يعني ؟؟
ترنيم: الا ما قلت لكم سالفتي ؟؟ .. وشلون كنت ترنيم ثانية؟
بسيل وريم: لا!
ترنيم: وآنه قررت اليوم اقول لكم .. بحكم علاقة الصداقة اللي بينا .. واتمنى تفهمون موقفي ..,
هزت راسها ريم بمعنى أي..,,
وبدأت ترنيم تتكلم: لما كنت بأيام الثانوية .. قعدت ترجع بذاكرتها للوراء .. كانت حالتنا المادية اشبه بالفقر !!.. كنا نعيش اليوم ما ندري عن باجر !!. وصلت الى توجيهي وآنه احمد ربي إني آخر سنة ثانوي وقدرت اوصل لهذي المرحله .. اشكر ربي .. ومن بعدها اشكر امي اللي كانت تذبح روحها قدام آله الخياطة وهي تخيط لها الثياب بس عشان تجمع لنا اللي يعيشنا ويخلينا ما نفقد الامل بإن نعيش باجر .. ابوي تركنا من سنوات .. من كان عمري 11 سنة .. طلق امي .. واتزوج له وحدة ثانية .. وهو ناسي ان عنده مطلقة عندها بنت منه !!. وما عندها اهل ولا سند !!.. انقطعت اخباره .. ما قمنا نعرف عنه ولا شيء !!.. وصل يوم وكنت اذاكر فيه لآخر امتحان عندنا في المدرسة وهو الريض .. في ذاك اليوم امي زارتني وقالت لي بإن واحد كبير بالسن " ابو سلمان " بس الحمد لله عايش وقادر على إنه يعيشني احسن عيشة يمكن كنت احلم فيها !.. تقدم لي ويبي يتزوجني !!.. فاجئني الموضووع وااايد .. آخر عمري باخذ واحد في نفس سن ابوي .. طول الليل وآنه افكر .. ياليت افكر بإمتحان باجر .. لا !!.. افكر بالموضوع هذا ماغيره .. كنت افكر من كل صوب .. بس في النهاية استقريت على إني اوافق !!.. أي نعم اوافق .. عشان اذوق امي شوي من طعم الراحة الي ماذاقتها طول حياتها .. عشان يمكن آنه بعد احصل الراحة ونفسيتي تعيش مرتاحة .. وقعدت الصبح رحت قدمت الامتحان .. ما اجذب عليكم .. بس ما ادري شنو خطت ايدي على الورقة ذاك اليوم .. رديت البيت وقابلت امي بإبتسامة .. اللي كانت قدام خياطتها وتخيط ..,’
ام ترنيم: ها يمه بشري؟
ترنيم: ان شاء الله خير .. يمه
ام ترنيم: عيونها ..
ترنيم: برد على الموضوع اللي كلمتيني فيه امس
ام ترنيم تركت اللي في ايدها والتفتت على بنتها:..!!
ترنيم: يمـه آنه موافقه ..
ام ترنيم: يمه ما ابي ردج الحين انتي فكري بالموضوع عدل ..
ترنيم: بس يمـه فكرت بالموضوع وآنه موافقة؟؟
ام ترنيم اللي قلبها ياكلها على بنتها اللي بتضيع عمرها من الحين: بس يمه المعرس بمثابة ابوج .. بتاخذينه؟ .. آنه لو كنت مكانج ما كنت بقبل ..
ترنيم بإبتسامة: لو كنتي مكاني يا يمه صدقيني بتقبلين .. وآنه اشوف ان هذي الموافقة فيها راحة لي ولج ..
ام ترنيم: يمه آنه راحتي إني اشوفج مرتاحة .. بس لا تضعين عمرج طلبتج؟!
ترنيم: يمه رأيي خذيته عن اقتناااع .. وآنه راضية باللي كتبه لي ربي .. وصدقيني نصيبي آخذ ابو سلمان ..
ريم: يعني انتي تزوجتي؟!
ترنيم هزت رأسها بمعنى أي
بسيل: ومن ابو سلمان؟؟؟؟!
ترنيم: أي .. خلوني اكمل لكم السالفه !!
بسيل: يالله !
ترنيم وهي توجه نظرها لبسيل: كنت وحدة مثلكم ..ملتزمة بحجابي .. محتشمة في لبسي .. لكن من يوم اخذت ابو سلمان تسلط علي .. كان يجبرني اروح معاه الى عزايمه .. واجتماعاته .. من بعد ما غير من مظهري .. ولبسي .. وحتى شخصيتي .. كان كل شيء يمشيه على رأيه .. بس اللي كان يسعدني بزواجي هذا .. إني قدرت اريح امي شوي بحياتها .. ما انكر انها اوقات تحس باللي اعانيه قدام ابو سلمان .. بس اوقات اقنع روحي انها ما تحس !. لأني كثر ما اقدر ابان لها بإني مرتاحة .. ماتت امي من بعد زواجي بنص سنه تقريباً .. وآنه عايشة مع ابو سلمان .. اللي كان متسلط علي من صوب .. وعياله من زوجته الثانية اللي كانوا يغثوني من كل صوب .. بس صبرت وتحملت عشان بس لا اتطلق واكون بنظر العالم مطلقه !!.. كفاية اتزوجت وآنه صغيره ومن واحد يكبرني بأعوام .. الا ان مرت سنة ونص ومات ابو سلمان .. وابتسمت .. صرت ارمله !. ويتيمه !.. الى امس عياله كانوا يطالبوني بحلاله .. صح إني ما طلعت بشيء غير البيت اللي كنت ساكنه فيه .. بس الحمد لله .. وهم اللي طلعوا ببيت والشركات .. وكل فلوسه .. بعد يلاحقوني من مكان الى ثاني .. عشان البيت اللي ساكنه فيه .. قلت اشتغل عشان اصرف على نفسي .. وزين ان عندي ذاك الوقت شهادة ثانوية .. ونظراً لحالي قبلوني في هذي المجله .. بس راح من بالي شيء مهم .. وهو ان ارجع لحياتي قبل .. لشخصيتي قبل .. لحجابي .. لطريقي اللي امشي عليه .. يمكن من كثر ما قست علي الدنيا .. تعلمت اكون انسانه من غير احساس مثل اللي كانوا عايشين حولي .. من جذي اول ما تقابلنا .. كنتوا تشوفوني غير ..
ريم: بس الحين نشوفج غير ..
ترنيم هزت راسها بمعنى أي !!.
بسيل: ترنيم .. تدرين ما كنت اتوقع ان وراج كل هذي السالفه وهذي الحياة !!
ترنيم: بس هذي الدنيا .. ولا تستغربين .. لأنج انتي اللي ما توقعتج تستغربين .. لأنج معتاده على القضايا اللي تناقشينهم ..
بسيل قعدت تفكر .. شكثر ظلمنا ترنيم فوق ماهي مظلومة ببداية دوامنا بالمجله !!..
ريم: الله كريم !.,’
ترنيم وهي تبي تطلع من الجو اللي هم فيه: اوووه بسييل ما بتعشينا ؟.! ..

كانت تبي تطلع وتطلعهم من الجو .. لأنها عاهدت نفسها من اليوم ان كل شيء يكون بالنسبة لها ماضي .. والحمد لله الحين هي عايشة .. احلى عيشة بالنسبة لها .. لأنها بدأت تطنش عيال ابو سلمان .. وبدأت تعيش ببيتها مرتاحه .. صح ان ما وراها سند ولا رجال .. لكنها اخذت امها لها قدوة .. وهي انها شلون عاشت من غير سند وصانت نفسها .. والحمد لله بدأت تبي لها علاقات صداقة .. وكأنهم اخواتها ..
بسيل بإبتسامة: دقائق ويكون الاكل قدامكم ..,,
ريم: تبين مساعده؟
ترنيم: أي صح تبين مساعده؟؟؟
بسيل: لا مشكوورين فديتكم .,’

وقامت بسيل تجهز السفرة .. عشان يبدأون عشاء .. بس ما تنكر انها تفكر بسالفه ترنيم !..
وريم الثانية كانت شاغله بالها بالتفكير في حياة ترنيم .. لكن ترنيم ما سمحت لها وبدأت تسولف معاها بسوالف عشان تنسيها